Новым павераным у справах ЗША ў Беларусі прызначаная Джэніфер Мур
- 17.08.2018, 15:58
- 14,734
Джэніфер Мур пачне працу на пасадзе паверанага ў справах ЗША ў Беларусі ўжо ў гэтым месяцы.
«Джэніфер Мур пачне працу на пасадзе паверанага ў справах ЗША ў Беларусі ў жніўні 2018 года», - гаворыцца ў паведамленні дыпмісіі.
У пасольстве адзначылі, што перад прыездам у Менск Мур займала пасаду намесніцы дырэктара ўправы ў справах Паўднёвай Еўропы Дзяржаўнага дэпартамента ЗША, якая адказвае за стасункі ЗША з Турцыяй, Грэцыяй і Кіпрам.
Акрамя таго, новы павераны мае багаты досвед работы ў еўрапейскай тэматыцы і цягам большай часткі сваёй кар'еры спецыялізавалася ў пытаннях міжнароднага супрацоўніцтва і рэформаў у галіне бяспекі. Раней яна працавала ў якасці намесніцы дырэктара ўправы Дзярждэпартамента ў міратворчай дзейнасці, санкцый і барацьбе з тэрарызмам, дарадцы ў палітычных і эканамічных пытаннях амбасады ЗША ў Тыране, а таксама на розных пасадах у палітычным, вайскова-палітычным і эканамічным аддзелах у пасольстве ЗША ў Анкары, Сараеве, Багдадзе і Джакарце.
Таксама Мур займала пасаду дзяжурнай супрацоўніцы Аператыўнага цэнтра Дзярждэпартамента і асістэнткі памочніка Дзяржсакратара ў вайскова-палітычных пытаннях.
Як паведамлялася, папярэдні часовы павераны ў справах ЗША Роберт Райлі скончыў сваю дыпламатычную місію ў рэспубліцы ў ліпені. Ён працаваў у Менску два гады.
З 2008 года ў Беларусі няма амбасадара ЗША.