«Не ведаю ніводнага чалавека, хто быў бы задаволены прыездам Лукашэнкі ў Воршу»

Што кажуць і думаюць аршанцы пра грандыёзны разнос, які быў учынены напярэдадні дыктатарам?

Пра гэта «Салідарнасці» распавёў мясцовы грамадскі актывіст Генадзь Шэпелеў.

— Пачну з таго, што не ведаю ніводнага чалавека, які быў бы задаволены самім прыездам Лукашэнкі ў горад. Абураныя ўсе былі. Перакрылі горад, не праехаць было. Мяне нават на ровары спынілі і назад завярнулі.

Аршанец распавёў, што большасць ягоных знаёмых успрымаюць такія візіты, як спектакль: «Усе цудоўна разумеюць, што гэта паказуха».

Хоць ёсць яшчэ і тыя, хто пасля прагляду навін па тэлевізары задаволена пацірае рукі. Маўляў, усыпаў Лукашэнка чыноўнікам. Але такіх мала, кажа Генадзь Шэпелеў.

Суразмоўца «Салідарнасці» распавёў пра рэакцыю на візіт у Воршу дыктатара знаёмых начальнікаў.

— Скардзяцца, што іх усё дастала. Моцна незадаволеныя такімі наездамі. Адзін кіраўнік нават расейскага класіка працытаваў: «Служыць гатоў, прыслужвацца агідна».

Іншы абураўся тым, што так хутка Пазняка зняў Лукашэнка, не даў яму як след агледзіцца.

Аршанец скептычна ставіцца да ратацыі мясцовых кадраў. На ягоную думку, у кожным выпадку новыя прызначэнцы не будуць самастойныя ў сваіх пастановах і, як і іх папярэднікі, будуць кожны раз аглядацца на Менск.

Адзінае, што цікавіць Генадзя Шэпелева, як новая адміністрацыя сёлета паставіцца да штогадовага святкавання Аршанскай бітвы:

- Верасень ужо хутка, паглядзім.