«Нязначны кавалачак»: у ЖКГ пракаментавалі падзенне на мянчанку цэглы з даху
11- 14.01.2019, 12:13
- 15,112
Камунальнікі агучылі сваю версію таго, што адбылося.
10 студзеня, калі працоўныя чысцілі дах дома ад снегу, на мянчанку Варвару Казлову звалілася цэгла. У выніку ў дзяўчыны дыягнаставалі пералом і гематому. Пры гэтым, паводле ейных слоў, ходнік не быў нармальна абгароджаны. Журналісты tut.by даведаліся, што з гэтай нагоды кажуць у ЖКГ Кастрычніцкага раёна.
Нагадаем, працоўныя чысцілі дах дома №5 на вуліцы Ленінградскай ля чыгуначнага вакзалу. У гэты час мянчанка Варвара ішла на працу. Уздоўж ходніка, з ейных слоў, агароджы не было. Дарогу яна і яшчэ некалькі чалавек абыходзілі праезнай часткай. Калі рабочыя скідалі снег, разам з ім на нагу дзяўчыне звалілася цэгла. У траўмапункце высветлілася, што ў яе зламаны палец і ўтварылася гематома на назе. Пасля гэтага спадарыня напісала заяву ў міліцыю.
Сітуацыю нам пракаментавала намесніца дырэктара ЖКГ Кастрычніцкага раёна Алена Паваротная.
- Ачыстка даху ад снегу і наледзі па вуліцы Ленінградская, 5, 10 студзеня ажыццяўлялася падраднай арганізацыяй з выкананнем патрабаванняў бяспекі. На праезнай частцы быў усталяваны знак, да якога нацягнута сігнальная агароджвальная стужка, што абмяжоўвае рух пешаходаў у зоне работ (гэта адлюстравана на першым фота). Рух пешаходаў быў арганізавана супрацьлеглым бокам.
Уздоўж ходніка таксама была нацягнутая сігнальная стужка. Кантроль за ходам работ ачысткі даху ажыццяўляўся работнікам выканаўчай арганізацыі з зямлі, які таксама паказваў пешаходам на неабходнасць пераходу на процілеглы бяспечны бок вуліцы.
Са слоў намесніцы дырэктара ЖКГ, Варвара Казлова праігнаравала ўстаноўлены знак і агароджу ды ішла праезнай часткай у непасрэднай блізкасці ад зоны прац.
- На вусныя папярэджанні выканаўцы прац арганізацыі яна не рэагавала, бо была ў слухаўках. Пры ачыстцы парапетаў і пахілаў даху адбылося падзенне малаважнага абледзянелага кавалачка цаглянага мура вентыляцыйнай шахты на ходнік у агароджаную зону, які пры падзенні адскочыў і трапіў у нагу пацярпелай. Выканаўца работ неадкладна адрэагаваў на здарэнне і выклікаў хуткую дапамогу.