Новыя тарыфы на паслугі ЖКГ: Як у Беларусі падаражэла «камуналка»?

Некаторыя тарыфы ў рэгіёнах вышэйшыя, чым у сталіцы.

Ва ўсіх абласцях краіны і ў Менску ўстанавілі новыя кошты паслуг ЖКГ. Некаторыя тарыфы ў рэгіёнах вышэйшыя, чым у сталіцы.

Пастанова Берасцейскага аблвыканкама, якая зацвердзіла кошты паслуг ЖКГ, апублікаваная на Нацыянальным прававым партале і ўвайшла ў дзеянне з 1 студзеня, піша intex-press.by.

Павышаныя субсідаваныя тарыфы на ваду і капрамонт. Кошт водазабеспячэння вырас з 0,8053 да 0,8383 рубля за кубаметр, каналізацыі - з 0,6191 да 0,6383 рубля за кубаметр. Тарыф на капрамонт павялічыўся з 0,0953 да 0,1001 рубля за квадратны метр агульнай плошчы жылля.

Такім чынам, для сям'і з трох чалавек, якая пражывае ў двухпакаёвай кватэры 48 квадратных метраў і якая выкарыстоўвала нарматыўныя 12 кубоў вады, вада і капрамонт падаражэюць з 21,6 да 22,5 рубля.

Выраслі таксама некаторыя тарыфы, якія забяспечваюць поўную кампенсацыю выдаткаў на паслугі ЖКГ. Паводле поўных тарыфаў налічваюць «камуналку» ў кватэрах, дзе ніхто не зарэгістраваны. Напрыклад, водазабеспячэнне падаражэла з 0,8132 да 0,8688 рубля за адзін кубаметр, каналізацыя - з 0,6939 да 0,7440 рубля за кубаметр, тэхабслугоўванне - з 0,1251 да 0,1274 рубля за квадратны метр жылля, тэхабслугоўванне ліфта - з 1,47 да 1,5 рубля за кожнага чалавека.

Кошты некаторых паслуг ЖКГ - розныя для Менска і рэгіёнаў. Напрыклад, у сталіцы ніжэйшы субсідаваны тарыф на каналізацыю, поўныя тарыфы на тэхабслугоўванне жылога дома, ліфта, водазабеспячэнне і каналізацыю.

Як паведамлялася раней, са студзеня ў Беларусі таксама павінны былі падаражэць тарыфы на газ і электрычнасць. Кошты гэтых паслуг ЖКГ зацвярджае Савет міністраў, і афіцыйнага апублікавання дакумента яшчэ не было. Чакаецца, што агулам кошты «камуналкі» для сям'і з трох чалавек, якая пражывае ў тыпавой двухпакаёвай кватэры, у параўнанні са снежнем вырастуць на $3,9 у эквіваленце (з улікам ужо падаражэўшых паслуг).