Расеец арыштаваны на выспе ў Ціхім акіяне на запыт ЗША
2- 5.01.2019, 17:04
- 16,546
Дзмітрыя Макаранку абвінавачваюць у спробе вывезці вайсковую тэхніку з ЗША.
Грамадзянін Расеі Дзмітрый Макаранка арыштаваны на ціхаакіянскім востраве Сайпан на запыт ФБР ЗША. Ён прыбыў туды 29 снежня са сваімі дзецьмі і бацькамі і быў затрыманы ў аэрапорце адразу пасля прылёту, паведамляе ў суботу, 5 студзеня, МЗС РФ, піша «Немецкая волна».
Сайпан - найбуйнейшы востраў і сталіца Паўночных Марыянскіх Астравоў у Ціхім акіяне, гэта асацыяваная з ЗША тэрыторыя. Адтуль Макаранка быў этапаваны ў Фларыду. Амбасада РФ у ЗША дамагаецца консульскага доступу да яго. Дыпламатычнае ведамства «даведалася пра тое, што здарылася з ім не ад амерыканскіх праваахоўных органаў, а ад яго блізкіх», удакладняе МЗС РФ.
Ордэр на арышт Макаранкі быў выдадзены яшчэ ў чэрвені 2017 года, суд Фларыды арыштаваў яго 31 снежня 2018 года. Мужчыну абвінавачваюць у спробе вывезці вайсковую тэхніку з ЗША, між іншым, ружэйныя прыцэлы начнога бачання, цеплавізійныя монакуляры падвойнае прызначэнне і капсулы для боепрыпасаў, паведамляе РІА «Новости» са спасылкай на звесткі амерыканскага суда. Усяго яму ставяць у віну восем злачынных эпізодаў, за іх Макаранка пагражае да 45 гадоў турмы.
Згодна з матэрыяламі справы супольнікам Макаранкі з'яўляецца грамадзянін ЗША Уладзімір Невідомы. Этнічны ўкраінец летам мінулага года быў прысуджаны да двух гадоў і двух месяцаў турэмнага зняволення за ўдзел у змове з мэтай незаконнага экспарту вайсковых тэхналогій у Расею.