Якія прэм'еры чакаць у сталічных тэатрах у студзені

Чатыры прэм'ерных спектаклі прэзентуюць беларускім гледачам у студзені 2019 года.

Нацыянальны акадэмічны тэатр імя Янкі Купалы

15 студзеня на вялікай сцэне Нацыянальнага акадэмічнага тэатра імя Янкі Купалы пакажуць спектакль «Вешальнікі» паводле п'есы ірландскага драматурга Марціна МакДонаха. Над пастаноўкай працуе беларускі рэжысёр Віталь Краўчанка, піша сайт mag.relax.by.

«Вешальнікі» - чорная камедыя, падзеі ў якой разгортваюцца ў 1965 годзе на поўначы Англіі ў дзень скасавання смяротнага пакарання. Гэтая навіна бянтэжыць галоўнага героя - ката Гары Уайда, які застаецца без улюбёнай працы. У цэнтры ўвагі - тэмы смяротнага пакарання, кошт судовай памылкі і каштоўнасці чалавечага жыцця.

24 студзеня на камернай сцэне тэатра адбудзецца прэм'ера спектакля «Ураджай», які ставіць рэжысёр Дзмітрый Цішко паводле п'есы Паўла Пражко.

Гэта камедыйная гісторыя пра тое, як перад чатырма маладзёнамі была пастаўлена звышскладаная задача - збор яблыкаў у восеньскім садзе. Спектакль «Ураджай» - гэта крывое люстэрка, у якім кожны глядач зможа ўбачыць і даведацца нешта да болю знаёмае.

Рэспубліканскі тэатр беларускай драматургіі

16 студзеня ў тэатры беларускай драматургіі прэзентуюць новы спектакль «Мудрамер». Інсцэніроўку сатырычнай камедыі Мікалая Матукоўскага робіць рэжысёр Аляксандр Гарцуеў.

З сюжэту п'есы, герой вынаходзіць прыбор для вымярэння ступені чалавечага інтэлекту і называе яго «дурамер». Аднак у міністэрстве не ўхваляюць ідэю і даюць заданне стварыць прыбор для вымярэння мудрасці.

21 студзеня на сцэне гэтага тэатра адбудзецца прэм'ера незалежнага праекта HomoCosmos «Дора, або Сэксуальныя неўрозы нашых бацькоў». П'есу сучаснага швайцарскага драматурга Лукаса Берфуса ставіць беларускі рэжысёр Віталь Дудзін.

У цэнтры ўвагі - праблемы маральнага выбару. Дзяўчынка Дора жыве ў свеце, дзе кантроль - залог спакою. Аднак экспэрыменты значна бліжэйшыя сэрцу гераіні.