Расея прапанавала Кітаю адно з апошніх буйных радовішчаў нафты ў Сібіры

Запасы кластара ацэньваюцца амаль на мільярд тон.

«Раснафта» і «Нафтагазхолдынг» паплечніка Ігара Сечына Эдуарда Худайнатава рыхтуюць угоду для продажу азіяцкім інвестарам буйной долі ў радовішчах нафты на поўначы Усходняй Сібіры, паведамляе finanz.ru.

Як паведамляюць «Ведомости» са спасылкай на федэральных чыноўнікаў і крыніцы, знаёмыя з ходам перамоваў, пакупнікам з Кітая, а таксама з Індыі прапануюць да 40% у праекце, які аб'яднае чатыры радовішчы ў Краснаярскім краі, у тым ліку якія ўваходзяць у Ванкорскі кластар, які расейскія дзяржаўныя СМІ называюць «найбуйнейшым паўночным актывам» краіны.

Кластар, які ўключае чатыры зоны здабычы, з'яўляецца адным з апошніх буйных радовішчаў расейскай нафты, дзе нетры яшчэ не знясіленыя. Адкрытыя ў 1990-х, гэтыя залежы стаялі закансерваванымі амаль два дзесяцігоддзі і былі ўключаныя ў здабычу толькі ў 2010-х.

Сумарныя запасы кластара ацэньваюцца амаль на мільярд тон, або 8,6% ад усіх рэнтабельных запасаў у краіне (на ацэнку Раснетраў).

У перыметр угоды ўвойдуць гіганцкае Ванкорскае радовішча (запасы амаль паўмільярда тон), Лодачнае (73 млн тон, запушчанае ў 2019 годзе) і Тугульскае радовішча (45 млн тон).

Да іх дадасца Паяхскае радовішча «Нафтагазхолдынгу», супольны праект «Раснафты» з ВР «Ярмак нафтагаз», а таксама ўсходнетаймырскае радовішча. Іх аб'яднаюць пад агульнай юрасобай - «Усход Ойл», долю ў якім мяркуецца прадаць.

Увесь праект зыходзячы з запасаў ацанілі на 15 млрд даляраў. Улетку ішла гаворка аб продажы 40%, цяпер абмяркоўваецца 15-20%, кажуць крыніцы «Ведомостей». Такім чынам, сума ўгоды можа скласці ад 3 да 7 млрд даляраў. Зрэшты, дамоўленасцей як па суме, так па структуры пакуль няма.

«Стаіць чарга з ахвотных» купіць - гэта інвестары з Паўднёва-Усходняй Азіі, кажа іншая крыніца «Ведомостям». З яе слоў, долю прапаноўвалі Кітаю. Увосень пачаліся перамовы з Індыяй.

У сярэдзіне верасня дэлегацыя «Раснафты» на чале з Сечыным наведала краіны, і мясцовыя кампаніі «пацвердзілі сваю цікавасць да магчымага ўдзелу ў праекце «Усход ойл».

Усе пакупнікі намагаюць на зніжэнні падатковай нагрузкі: радовішчы знаходзяцца за палярным кругам, і ім патрэбныя ільготы, якіх на ўзроўні прэзідэнта спрабуе дамагчыся «Раснафта».

Праекту патрэбныя вызваленне ад ПЗКВ, падатковы вылік на суму інвестыцый, нулявыя стаўкі падатку на маёмасць і зямельнага падатку. Агульны аб'ём ільгот - 2,6 трыльёна рублёў за 30 гадоў.

«Без падатковых стымулаў распрацоўка ўчасткаў тэхналагічна магчымая, але бессэнсоўная з эканамічнага пункту гледжання», - кажа федэральны чыноўнік. Стратэгічны партнёр праекту патрэбен хутчэй для таго, каб забяспечыць новыя рынкі збыту, дадае ён.