Унука Назарбаева асудзілі за напад на паліцыянта ў Лондане
16- 18.10.2019, 16:29
- 22,819
Казахстанскія ўлады спрабавалі замяць справу.
Айсултан Назарбаеў, 30-гадовы ўнук першага прэзідэнта Казахстана Нурсултана Назарбаева, прызнаны вінаватым у тым, што ён пад уздзеяннем наркотыкаў надаў супраціў паліцыянтам, ударыў і ўкусіў аднаго з іх. Паводле версіі следства, на руцэ афіцэра паліцыі застаўся глыбокі след ад укусу, а з раны «моцна цякла кроў», піша BBC.
Прысуд прадугледжвае выпрабавальны тэрмін 18 месяцаў. Калі цягам гэтага тэрміну ён парушыць закон, прысуд стане з умоўнага рэальным.
Акрамя гэтага, Назарабаеў павінен адбыць 140 гадзін грамадскіх работ і 20 абавязковых сесій для прадаўжэння лячэння ад наркатычнай залежнасці, а таксама выплаціць штраф 1000 фунтаў і кампенсаваць шкоду 5000 фунтаў.
Айсултан Назарбаеў - сын старэйшай дачкі экс-прэзідэнта Казахстана Дарыгі Назарбаевай і ягонага апальнага зяця, цяпер нябожчыка Рахата Аліева. Ён скончыў Каралеўскую вайсковую акадэмію ў Сандхерсце і быў залічаны ў штат Галоўнай выведвальнай управы Міністэрства абароны Казахстана. У 2017 годзе Айсултан працаваў у федэрацыі футбола Казахстана.
Што адбылося?
Паводле судовых дакументаў, 3 чэрвеня гэтага года Айсултан Назарбаеў зладзіў перапалох у адным з гатэляў у цэнтры Лондана. Ён выбягаў на балкон і пагражаў скончыць з сабой. Адміністрацыя выклікала паліцыю.
5 чэрвеня такі інцыдэнт паўтарыўся ў кватэры па Тавістак-стрыт у цэнтры Лондана. Назарбаеў быў на балконе і нешта выкрыкваў. Суседзі палічылі, што ён выкрыквае тэрарыстычныя лозунгі і выклікалі паліцыю. Паводле версіі абароны, Назарбаеў выкрыкваў слова «Алах», бо ён прасіў аб дапамозе.
Паводле інфармацыі следства, Назарбаеў пракраўся ў кватэру дзяўчыны па імя Ксенія Шэвелева. Яна сцвярджае, што не ведае Назарбаева. Відавочна, ён трапіў у яе кватэру праз балкон. Мэбля на балконе і ўнутры кватэры пашкоджаная, таксама як і іншыя рэчы. Яна знайшла ў скрыні свайго стала пашпарт і партманэт Назарбаева, а ў пральнай машынцы - ягоныя рэчы. Шкода кватэры і рэчам дзяўчыны ацэненая на 5 тысяч фунтаў. Яна таксама адчувала страх і праблемы са сном пасля інцыдэнту.
Потым, як паведамілі ў судзе, Айсултан Назарбаеў палез на дах, пахадзіў там і саскочыў на балкон іншай жанчыны. Яна і выклікала паліцыю. Афіцэр прыбыў на месца адзін і спрабаваў прадухіліць пранікненне Назарбаева ў кватэру.
У судзе быў паказаны відэазапіс з камеры на паліцыянце, які спрабаваў затрымаць Назарбаева.
На запісе відаць, як афіцэр загадаў Назарбаеву легчы на падлогу і не рухацца. Назарбаеў не паслухаўся і рушыў у бок паліцыянта. Той чатыры разы ўжыў электрашокер.
У нейкі момант Назарбаеў змог сарваць з сябе частку электрашокера, якая падавала зарад, і атакаваў паліцыянта. Гэты момант дрэнна бачны на камеры - затое відаць, як з рукі афіцэра пачынае капаць кроў. Затым прыбыла падмога, і Назарбаеў быў затрыманы. У паліцыянта застаўся шнар. Таксама яму спатрэбіўся час для аднаўлення ўпэўненасці ў сабе і ўпэўненасці ў магчымасці прадаўжэння службы.
Паводле справаздачы паліцыі, унук казахстанскага лідара агулам спрабаваў надаваць супраціў дзеянням паліцыянтаў цягам 53 хвілін.
У 2007 годзе Назарбаеву было вынесенае папярэджанне ў Казахстане за бойку ў начным клубе. У астатнім характарыстыкі пра яго станоўчыя.
Паводле звестак боку абвінавачвання, спачатку прадстаўнікі Казахстана спрабавалі замяць справу.
Са слоў абвінаваўцы, у паліцыю паступіў званок ад «прадстаўніка казахстанскіх уладаў», які спрабаваў уступіць у перамовы, каб «не ганьбіць сям'ю Назарбаевых», аднак паліцыянты «ўступаць у кантакт адмовіліся».
Пашпарт унука экс-прэзідэнта Казахстана быў канфіскаваны.
Месяцы лячэння
Паводле інфармацыі следства, Айсултан Назарбаеў ужываў какаін. Пасля першага слухання справы суддзя выпусціў Айсултана з-пад варты пры ўмове, што той тут жа будзе адпраўлены на лячэнне ў прыватную клініку.
Наколькі вядома, Назарбаеў у выніку праходзіў лячэнне ў Priory - вядомай клініцы для нарказалежных, дзе ў розны час праходзілі курсы рэабілітацыі музыкі Эмі Уайнхаўс і Робі Уільямс, футбаліст Джордж Бест і актор Джоні Дэп.
Сам Айсултан Назарбаеў яшчэ ў 2017 годзе ў сваім «Фэйсбуку» прызнаваў, што ён ужываў наркотыкі пасля смерці свайго бацькі Рахата Аліева, зяця прэзідэнта, які ўцёк з Казахстана ў Аўстрыю і, паводле афіцыйнай версіі, і скончыў там жыццё самагубствам у турме. Тады Айсултан Назарбаеў казаў, што з залежнасцю яму дапамаглі справіцца яго дзед і Усявышні.
У справаздачы з клінікі Priory, дзе Назарбаеў некалькі месяцаў лячыўся ад наркатычнай залежнасці, гаворыцца, што ўнук Назарбаева выконваў указанні лекараў і паказаў вялікі прагрэс і мэтанакіраванасць.
Суддзя сказаў, што прыняў да ўвагі поспехі ў лячэнні і вызначыў, што далейшае лячэнне лепш прадаўжаць на волі, чым у турме. Адвакат Назарбаева ад ягонага імя сказаў, што выпрабаваў велізарнае палягчэнне, пачуўшы прысуд. Сам Назарбаеў пакуль адмовіўся гутарыць з журналістамі.
Адвакат у сваім інтэрв'ю сказаў, што задаволены прысудам. І што яго падабаронны з моманту затрымання прайшоў велізарны шлях і цяпер зусім іншы чалавек, які стаў на шлях выпраўлення.