Навукоўцы: Людзі паўнеюць ад цукру з напояў, а не з ежы

«Цвёрды» цукар на постаці не адбіваецца.

«Даследаванне, праведзенае на мышах, паказала, што менавіта цукар у вадкай форме выклікае павелічэнне вагі, у адрозненне ад цукру, які змяшчаецца ў цвёрдай ежы», - піша Le Figaro (пераклад - inopressa.ru).

«(...) Даследаванні паказваюць, што ва ўзросце ад 20 да 55 гадоў мы агулам папраўляемся на паўкілаграма за год, у той час як наш арганізм павінен збалансаваць амаль мільён калорый, якія паступаюць, з эквівалентнымі выдаткамі, - гаворыцца ў артыкуле.

«Дзіўна, што такое ўпартае адхіленне заснаванае на надзвычай слабым энэргетычным дысбалансе, - тлумачыць даследчык у галіне нейрабіялогіі Мішэль Дземюржэ ў сваёй кнізе «Антыдыета. Схуднець назаўжды» (выдавецтва Éditions Belin). - Паўкілаграма, які вы набіраеце за год, узнікае праз залішняе спажыванне ўсяго толькі дзясятка калорый на дзень».

«Але ў балансе калорый некаторыя з іх займаюць асаблівае месца, бо наша цела іх не «бачыць». Гэта вадкія калорыі, асабліва тыя, якія ўтрымліваюцца ў падсалоджаных напоях. Як быццам старажытныя механізмы рэгулявання голаду не былі прызначаныя ні для чаго, акрамя адзінай вадкасці, неабходнай для жыцця: вады. Гэта пацвярджаецца ў артыкуле ў часопісе Molecular Metabolism, дзе распавядаецца аб даследаванні, праведзеным кітайскімі навукоўцамі з Акадэміі навук і Пекінскага інстытута генетыкі і біялогіі развіцця, якія працавалі пад кіраўніцтвам брытанскага прафесара Джона Спікмана з Універсітэта Абердзіна ў Вялікай Брытаніі.

«Цягам васьмі тыдняў даследчыкі дадавалі мышам цукар альбо ў напой, альбо ў цвёрдую ежу. У абедзвюх групах мышэй гэта адпавядала 73% спажываных імі калорый, але менавіта ў той групе, якая спажывала падсалоджаную ваду, назіраўся прырост у вазе і павелічэнне тлушчавай масы. У гэтай жа групе даследнікі выявілі, што мышы з'ядалі больш калорый, бо вадкі цукар спрыяў узмацненню апетыту», - адзначае журналіст Дам'ен Маскрэ.

«У даследнікаў паўстала ідэя параўнаць спажыванне цукру ў цвёрдай і вадкай форме, бо ў папярэднім эксперыменце яны заўважылі, што спажыванне харчовага цукру, адпаведнага 30% дзённай нормы калорый, не спрыяла росту масы цела ў мышэй. (...) Як бы там ні было, гэтыя звесткі яшчэ больш умацавалі недавер дыетолагаў да газіроўкі і іншых падсалоджаных напояў», - гаворыцца ў артыкуле.

«Не кажучы ўжо пра тое, што адмоўнае ўздзеянне выходзіць далёка за рамкі павелічэння вагі. Гэтым летам французскае кагортнае даследаванне NutriNet-Santé, апублікаванае ў часопісе British Medical Journal, паказала на павышаную рызыку развіцця ракавых захворванняў. Пры штодзённым спажыванні 100 мл падсалоджаных напояў рызыка развіцця рака павялічвалася на 18%», - рэзюмуе Маскрэ.