Назіральнікі: У Гомелі адбыўся байкот «выбараў»

Агучаныя рэальныя лічбы яўкі на ўчастках.

Назіральнікі зафіксавалі ў Гомелі значнае перавышэнне яўкі выбарнікаў у дзень галасавання на «выбарах» «дэпутатаў палаты прадстаўнікоў», паведамляюць naviny.by.

Да прыкладу, на ўчастку для галасавання №3 Гомельскага Савецкай акругі №34 назіральніца Ліяна Шуба налічыла за дзень галасавання больш за 370 выбарнікаў. У выніковым пратаколе камісіі было адзначана, што цягам 17 лістапада прагаласавалі 962 чалавекі.

Звесткамі ў назіранні падзяліўся таксама рэгіянальны каардынатар кампаніі «Права выбару» Васіль Палякоў. Назіранне было арганізаванае на ўсіх 40 участках Гомельскай Цэнтральнай №33 акругі.

Да прыкладу, паводле звестак назіральнікаў, на ўчастку №15 прагаласавалі 37,54% выбарнікаў (за час датэрміновага галасавання і ў асноўны дзень 17 лістапада), а паводле звестак камісіі – 57,74%.

Паводле інфармацыі назіральнікаў, на ўчастку №20 прагаласавалі 29,18%, у пратаколе камісіі яўка была паказаная 70,61%.

Аналагічна яўка была завышаная на ўчастку №17 (36,55% – у назіральнікаў, 64,41% – звесткі камісіі), на ўчастку № 27 (29,35% – назіральнікі, паводле звестак камісіі – 64,25%).

І на ўчастку №39, і на ўчастку №40 яўка значна адрознівалася: (23,42% выбарнікаў палічылі назіральнікі, 63,82% – камісіі, 25,88% – у назіральнікаў, 64,03% – у камісіі адпаведна).

Назіральнікі напісалі шэраг скаргаў у акруговую камісію Цэнтральнай акругі. З нагоды закрытасці падліку галасоў было пададзена восем скаргаў. Чатыры скаргі тычыліся разыходжання яўкі выбарнікаў.