Відэафакт: У Белавежскай пушчы алені прымаюць гразевыя ванны

Відэа знялі ў восеньскім лесе.

Відэа купання ў гразі аленяў выклаў на сайце нацыянальны парк «Белавежская пушча», піша tut.by.

У роліку бачна, як некалькі самак прымаюць гразевыя ванны прама пасярод восеньскага лесу.

«Гэтыя буйныя, стройныя і грацыёзныя жывёлы паводзяць статкавы лад жыцця і трымаюцца звычайна невялікімі групамі да 20 асобін. Вельмі рэдка, калі вышыня снежнага покрыва дасягае 70-100 см, яны вымушаныя збірацца паблізу кармавых палян у больш буйныя статкі да 60 асобін. Участкі пасялення самак і самцоў, як правіла, супадаюць толькі ў перыяд спарвання (жнівень-верасень)», - паведамляе нацыянальны парк.

На тэрыторыі Беларусі еўрапейскі высакародны алень быў шматлікім да XVII стагоддзя і, па некаторых звестках, вызначаўся больш буйнымі, чым цяпер, памерамі. Аднак у канцы XVIII стагоддзя гэты від капытных у Белавежскай пушчы быў цалкам знішчаны. У 1865 годзе сюды ў абмен на зуброў завезлі з Сілезіі першую партыю аленяў (5 самцоў і 13 самак). У натуральныя ўмовы высакародныя алені былі выпушчаныя толькі ў 1890 годзе, паклаўшы пачатак цяперашняй папуляцыі.