У МЗС Брытаніі назвалі ўмовы змены стаўлення да Расеі
3- 16.02.2019, 15:17
- 9,925
Вялікая Брытанія зменіць сваё стаўленне да Расеі толькі пасля таго, як тая абярэ іншы спосаб паводзінаў.
Пра гэта заявіў намеснік кіраўніка брытанскага МЗС Алан Данкан на сустрэчы з першым намеснікам кіраўніка МЗС Расеі Уладзімірам Цітовым, паведамілі ў брытанскім Міністэрстве замежных справаў.
Сустрэча дыпламатаў адбылася на палях Мюнхенскай канферэнцыі ў пытаннях бяспекі ў суботу, піша Еўрапейская праўда.
"Сэр Алан падкрэсліў, што паміж нашымі краінамі ёсць глыбокія рознагалоссі, і расейская дзяржава павінна выбраць іншы шлях і дзейнічаць як адказны міжнародны партнёр, перш чым могуць адбыцца змены ў нашых цяперашніх стасунках з Расеяй", – адзначылі ў брытанскім міністэрстве.
Данкан пацвердзіў цвёрдую пазіцыю Вялікай Брытаніі і хаўруснікаў у адказ на вар'яцкае выкарыстанне расейскай дзяржавай хімічнай зброі ў Солсберы.
Ён адзначыў, што важна захоўваць функцыянальныя каналы ўзаемадзеяння для абмеркавання міжнародных праблемаў, аднак даў зразумець, што Расея павінна даць адказ на непакой міжнароднай супольнасці, у тым ліку што тычыцца дэстабілізацыі ў Украіне.