Відэафакт: Вялікі Кітайскі мур ператварыўся ў коўзанку

Адна з галоўных славутасцяў Кітая стала сапраўднай паласой перашкод для турыстаў.

Праз непагадзь каменная паверхня сцяны пакрылася ледзяной скарынкай. Падымацца па ёй стала неймаверна складана, многія турысты падаюць, піша «Вокруг света».

Відавочцы знялі на відэа, як некаторыя смельчакі спрабуюць пераадолець гэтую паласу перашкод. Людзі трымаюцца за поручні, караскаюцца упрысядкі, хапаюцца за зямлю рукамі - і ўсё адно з'язджаюць ўніз.

У пачатку лютага ў Пекіне ўпершыню за сезон выпаў снег. З тых часоў непагадзь разгулялася не на жарт.

Гарадская метэаралагічная служба папярэджвае пра дрэнную бачнасць на дарогах і просіць кіроўцаў быць асцярожнымі.