Экс-прэзідэнт Бразіліі да Сілва прысуджаны да новага турэмнага тэрміну
2- 7.02.2019, 11:47
- 8,353
Яго абвінавацілі ў хабарніцтве і адмыванні грошай.
Былы прэзідэнт Бразіліі Луіс Інасіў Лула да Сілва прызнаны вінаватым у хабарніцтве і адмыванні грошай і прысуджаны да 12 гадоў і 11 месяцаў пазбаўлення волі. Гэты прысуд, вынесены ў сераду, 6 лютага, судом першай інстанцыі ў горадзе Курытыба, яшчэ можа быць абскарджаны, піша агенцтва dpa, паведамляе «Нямецкая хваля».
Суд палічыў даведзеным, што да Сілва дапамог адной з будаўнічых фірм атрымаць замовы ў кантраляванага дзяржавай нафтавага канцэрна Petrobras у абмен на рамонтныя работы ў маёнтку у горадзе Атыбая ў штаце Сан Паола.
«Як калі б яна была іх уласнасцю»
Лула да Сілва неаднаразова заяўляў, што ўласнікам маёнтка з'яўляецца не ён, а ягоны знаёмы прадпрымальнік. Аднак суддзя Габрыэла Хардт абгрунтавала сваю пастановы тым, што палітык і ягоная сям'я некаторы час карысталіся нерухомасцю так, «як калі б яна была іх уласнасцю».
У 2017 годзе Лула да Сілва ужо быў пакараны за карупцыю і адмыванне грошай да турэмнага зняволення на тэрмін 9 гадоў і 6 месяцаў, пасля павялічаны да 12 гадоў і 1 месяца. Цяпер 73-гадовы палітык адбывае пакаранне ў турме Курытыбе.
Суддзя Сержыў Мору, якi вынес да Сілву прысуд у 2017 годзе, сёння займае пасаду міністра юстыцыі і грамадскай бяспекі ў кабінеце прэзідэнта Жаіра Балсанару.