Аляксей Венедыктаў: Няма ніякага амбасадара ў Беларусі Бабіча, ёсць Пуцін

Выпады Бабіча зробленыя пры падтрымцы кіраўніка РФ.

Галоўны рэдактар радыёстанцыі «Эхо Москвы» Аляксей Венедыктаў у праграме «Будзем назіраць» апавёў, што думае пра стыль паводзінаў амбасадара РФ у Беларусі Міхаіла Бабіча, і пракаментаваў спрэчку дыпламатаў.

Апошнія два дні не суціхае рэзананс вакол узаемнага парыраванне МЗС Беларусі і расейскага амбасадара Бабіча. На хвалі дыскусіі Венедыктаў нагадаў, што і раней меркаваў прызначэнне Бабіча ў Менск «прызначэннем пракуратара ў заваяваную правінцыю».

«Я не такімі словамі казаў, але цяпер зразумела, што гэта так. Міхаіл Бабіч зусім не дыпламат, ён генерал. Даволі грубы. І кіраўнікі Прыволжскай акругі (там Бабіч раней быў паўнамоцным прадстаўніком Пуціна – рэд.) неаднаразова скардзіліся на ягоную грубасць прэзідэнту РФ. Спецыяльна менавіта чалавек з такімі кампетэнцыі быў прызначаны на пасаду амбасадара ў Беларусі.

Ну вось, МЗС Беларусі чарговы раз не вытрымаў або першы раз не вытрымаў, і даволі грубавата, у стылі генерала Бабіча, амбасадара Бабіча адказаў яму пра тое, што, мабыць, спадар Бабіч не бачыць розніцы паміж федэральнай акругай РФ і суверэннай дзяржавай. Намёк зразумелы. На што Бабіч назваў словы МЗС “балбатнёй”. Будзем назіраць. Але я хачу сказаць, што, безумоўна, Бабіч гэта робіць пры падтрымцы прэзідэнта Пуціна. У вас не павінна быць ніякіх сумненняў. Няма ніякага Бабіча. Ёсць Пуцін», – сказаў Венедыктаў.

На думку журналіста, расейская ўлада «падціскае ў публічнае і непублічнае поле беларускае кіраўніцтва ісці на больш глыбокую інтэграцыю». Пад інтэграцыяй, паводле словаў Венедыктава, маецца на ўвазе «аб'яднанне, а дакладней паглынанне Беларусі РФ», а з гледзішча Крамля розніцы паміж Крымам і Беларуссю няма. Бабіча, як мяркуе Венедыктаў, паставілі, каб тэхнічна забяспечыць гэтае паглынанне.