Хто б узначаліў Беларусь пры казахстанскім сцэнары?
39- 19.03.2019, 20:46
- 51,140
Такі сцэнар урэгуляваны ў Артыкуле 89 Канстытуцыі РБ.
Прэзідэнт Казахстана Нурсултан Назарбаеў сыходзіць у адстаўку. Паводле мясцовага заканадаўства, яго абавязкі будзе выконваць спікер парламенту Касым-Жомарт Такаеў.
Прарасейскія палітычныя тэлеграм-каналы, не разумеючы беларускай сітуацыі, пачалі выдаваць «інсайды»: маўляў, навіны з Казахстана выклікалі нездаровы ажыятаж у асяроддзі Міхаіла Мясніковіча, піша nn.by.
Нагадаем, Мясніковіч - спікер Савета Рэспублікі, верхняй палаты беларускага парламента.
Калі б гэтыя тэлеграм-каналы вялі людзі з Беларусі, яны б ведалі палажэнне Канстытуцыі:
Артыкул 89. У выпадку вакансіі пасады Прэзідэнта або немагчымасці выканання ім сваіх абавязкаў на падставах, прадугледжаных Канстытуцыяй, яго паўнамоцтвы да прынясення прысягі нававыбраным прэзідэнтам пераходзяць да прэм'ер-міністра.
Прэм'ер-міністр у Беларусі - Сяргей Румас. Менавіта да яго пры казахстанскім сцэнары перайшлі б паўнамоцтвы кіраўніка краіны.