Нямеччына заснавала парламенцкую асамблею з Францыяй
- 25.03.2019, 21:43
- 6,063
У Парыжы пачаўся першы саміт франка-нямецкай парламенцкай асамблеі.
Пра гэта паведамляе Deutsche Welle.
У сумесным саміце ўзялі ўдзел 50 дэпутатаў Бундэстагу і 50 заканадаўцаў з ніжняй палаты парламента Францыі. Прэзідэнт Бундэстага Вольфганг Шойбле і прэзідэнт Нацыянальнай асамблеі Рычард Феран падпісалі акт аб стварэнні новага фармату супрацоўніцтва.
Шойбле заявіў, што гэта падкрэслівае абавязанні дзвюх краін замацаваць супрацоўніцтва ў еўрапейскім кантэксце.
"Нямеччына і Францыя нясуць асаблівую адказнасць за Еўропу", - сказаў прэзідэнт Бундэстага, дадаўшы, што новая асамблея не пашкодзіць і не скасуе суверэнітэту любой нацыі.
Асамблея будзе збірацца двойчы ў год. Яна будзе прымаць сумесныя рэзалюцыі ў Нацыянальную Асамблею і Бундэстаг, якія не будуць мець абавязваючай юрыдычнай сілы.
22 студзеня праз 56 гадоў пасля падпісання Елісейскай дамовы – першай дамовы аб дружбе паміж Нямеччынай і Францыяй - канцлерка ФРГ Ангела Мэркель і прэзідэнт Францыі Эмануэль Макрон замацавалі подпісамі новую дамову аб пашырэнні двухбаковага супрацоўніцтва. У рамках Ахенскай дамовы Францыя і ФРГ абавязаліся пашыраць супрацоўніцтва ў сферы еўрапейскай і ўнутранай палітыкі, у тым ліку для барацьбы з тэрарызмам і арганізаванай злачыннасцю.