Леанід Судаленка: Для барацьбы з дэкрэтам аб «дармаедах» мы выкарыстоўваем усе даступныя механізмы

Справа «Марыя Тарасенка супраць чыноўнікаў» прадаўжаецца.

28 сакавіка апеляцыйная інстанцыя Гомельскага абласнога суда будзе вызначаць, ці маюць дармаеды права на судовае абскарджанне ўключэння іх звестак у так званыя спісы не занятых у эканоміцы. Справа ў судзе другой інстанцыі распачатая паводле прыватнай скаргі хатняй гаспадыні Марыі Тарасенкі, паведамляе «Гомельская вясна».

Нагадаем, суд Чыгуначнага раёна Гомеля адмовіўся з прычыны непадведамаснасці разглядаць першую «дармаедскую» скаргу хатняй гаспадыні на ўключэнне яе ў базу незанятых у эканоміцы. На вызначэнне суда Марыя Тарасенка з дапамогай прафзвязу РЭП падала прыватную скаргу ў судовую калегію грамадзянскіх спраў Гомельскага абласнога суда.

«Раённы суддзя адмовіўся распачаць справу на тую прычыну, што Дэкрэт №3 не прадугледжвае магчымасці судовага абскарджання дзеянняў так званых «дармаедскіх» камісій на месцах. У прыватнай скарзе абласному суду мы апелюем да артыкула 60 Канстытуцыі - «кожнаму гарантуецца абарона ягоных правоў і свабод кампетэнтным, незалежным і непрадузятым судом». Думаю, кампетэнцыі ў суддзяў дастаткова, а вось пра незалежнасць і бесстароннасць прапаную паразважаць пасля прынятай тут пастановы», - заявіў прававы інспектар прафзвязу РЭП Леанід Судаленка.

У прафзвязе РЭП заяўляюць, што пасля атрымання матывіровачнай часткі прысуду суда аб адмове Марыі Тарасенцы ў спагнанні маральнай шкоды таксама будзе пададзеная апеляцыйная скарга ў абласны суд. Юрыдычная служба прафзвязу раней адзначала, што разам з Марыяй Тарасенкай пачала стратэгічную цяжбу, куды ўваходзяць інфармацыйныя, прававыя і іншыя дзеянні, накіраваныя на скасаванне сумнавядомага Дэкрэта №3.

«Для дасягнення пастаўленай мэты мы будзем задзейнічаць усе даступныя механізмы. Напрыклад, пасля адмовы Марыі ў пазове пра маральную шкоду мы звярнуліся ў камісію для прызнання занятай у эканоміцы з прычыны стану яе здароўя. Цяпер мяч на баку камісіі. Плануем звярнуцца, у тым ліку і да так званых «упаўнаважаных суб'ектаў», якія маюць права на пастаноўку перад Канстытуцыйным Судом пытання аб канстытуцыйнасці Дэкрэта №3», - падзяліўся планамі прафсаюзны юрыст.