У Быхаве падлетак засіліўся на пажарнай лесвіцы Дома культуры
- 6.03.2019, 15:45
- 12,940
Следчым камітэтам распачатая крымінальная справа.
Пра гэта паведаміла «Радыё Свабода» афіцыйная прадстаўніца Следчага камітэта Юлія Ганчарова.
«З мэтай высвятлення ўсіх абставінаў распачатая і расследуецца крымінальная справа на падставе часткі 2 артыкула 145 Крымінальнага кодэкса. Следчыя дапытваюць сяброў, знаёмых, педагогаў. Чакаюцца вынікі экспэртыз, у тым ліку комплекснай псіхолага-псіхіятрычнай», - адзначыла Юлія Ганчарова.
Як удалося высветліць, цела 16-гадовага Мікіты М. знайшлі павешаным на пажарнай лесвіцы Дома культуры ўранку 4 лютага. Жыхары горада кажуць пра «няшчаснае каханне» і «канфлікт у гімназіі».
«Людзей насцярожвала, што хлопец засіліўся ў цэнтры горада і што ягоны ўчынак выглядае як помста камусьці», - выказалася адна з жыхарак райцэнтра.
Дырэктарка гімназіі Людміла Яршова адмаўляецца што-небудзь каментаваць. У аддзеле адукацыі Быхаўскага райвыканкама таксама ўстрымаліся ад выказванняў, бо «ідзе следства».
