Прэзідэнт Шры-Ланкі пасля тэрактаў надумаў звольніць кіраўнікоў усіх спецслужбаў

Кіраўнік дзяржавы прызнаў крах у працы спэцслужбаў у прадухіленні тэрактаў.

Прэзідэнт Шры-Ланкі Майтрыпала Сірысена ў аўторак заявіў, што да канца дня звольніць кіраўнікоў усіх устаноў, якія адказваюць за бяспеку ў краіне. Пра гэта кіраўнік дзяржавы заявіў у тэлезвароце да нацыі, паведамляе РБК са спасылкай на Reuters.

«Я цалкам змяню паліцыю і сілы бяспекі найбліжэйшымі тыднямі. Я разлічваю змяніць кіраўнікоў сілавых ведамстваў цягам 24 гадзін», - сказаў Сірысена.

Ён заявіў, што ў спецслужбаў была інфармацыя пра рыхтаваныя тэракты, але яны не праінфармавалі прэзідэнта. «Супрацоўнікі службы бяспекі, якія атрымалі справаздачу выведкі ад замежнай дзяржавы, не падзяліліся ёй са мной. Адпаведныя захады былі б прынятыя. Я надумаў распачаць строгія меры супраць гэтых службовых асоб», - удакладніў прэзідэнт.

Пра кепскую працу спэцслужбаў Шры-Ланкі раней заявіў і прэм'ер рэспублікі Раніл Вікрамасінгхе. На прэс-канферэнцыі ў Каломба ён заявіў, што інфармацыя, якой валодалі спецслужбы не дайшла ні да яго офіса, ні да офіса прэзідэнта.

«Мы, калі б ведалі, безумоўна, маглі б прадухіліць шматлікія напады ў цэрквах і гарантаваць большую бяспеку ў гатэлях», - сказаў Вікрамесінгхе. Ён удакладніў, што высвятляе ў адпаведных службовых асоб, як такое магло адбыцца. Прэзідэнт, паводле ягоных слоў, таксама разбіраецца ў сітуацыі, чаму інфармацыя не дайшла да ягонага офіса.

Паводле апошніх звестак, у выніку серыі выбухаў на Шры-Ланцы загінулі больш як 320 чалавек, у тым ліку 45 дзяцей. Сярод загінулых ёсць замежнікі. Выбухі прагрымелі ў некалькіх каталіцкіх цэрквах і гатэлях. Адказнасць за серыю нападаў узяла на сябе тэрарыстычная арганізацыя «Ісламская дзяржава». Улады Шры-Ланкі мяркуюць, што тэракты сталі акцыяй экстрэмістаў, праведзенай у якасці «адплаты» за атаку на мячэці новазеландскага горада Крайстчорч у сярэдзіне сакавіка 2019 года.