У Судане вайсковыя і цывільныя асобы вядуць перамовы аб супольным кіраванні
- 28.04.2019, 21:16
- 7,078
Вайскоўцы і апазіцыя, што прыйшлі да ўлады пасля зрынання правадыра, дасягнулі прынцыповай згоды.
У Судане вайскоўцы, якія прыйшлі ў гэтым месяцы да ўлады пасля зрынання прэзідэнта Амара аль-Башыра, і прадстаўнікі апазіцыі дасягнулі прынцыповай згоды аб стварэнні вайскова-цывільнага пераходнага ўрада, які павінен прывесці краіну да свабодных выбараў, паведамляе «Радыё Свабода».
Перамовы паміж вайскоўцамі і апазіцыяй, масавыя акцыі пратэсту, якія падарвалі стабільнасць рэжыму Башыра, раней былі перапыненыя, аднак аднавіліся пасля таго, як вайскоўцы паабяцалі пайсці на саступкі.
У суботу адбылася першая фармальная сустрэча двух дэлегацый.
Як паведамляюць агенцтвы, бакам пакуль не ўдалося дасягнуць згоды аб размеркаванні паўнамоцтваў паміж вайскоўцамі і цывільнымі грамадзянамі ў новым пераходным органе, а таксама аб тэрмінах пераходнага перыяду.
Са звестак The Guardian, апазіцыя намагае на 8 з 15 месцаў у пераходнай радзе, вайскоўцы ж хочуць захаваць большасць у ёй за сабой.
Цяпер Суданам кіруе Вышэйшая вайсковая рада, якая складаецца з 10 чалавек.
Амар аль-Башыр кіраваў краінай 30 гадоў. Вайскоўцы змясцілі яго ў турму. Шэраг прадстаўнікоў апазіцыі выступае за выдачу яго Міжнароднаму крымінальнаму суду ў Гаазе, які падазрае яго ў арганізацыі злачынстваў у правінцыі Дарфур.
У апошнія месяцы панавання аль-Башыра, са звестак СМІ, падвышаную актыўнасць у Судане праяўлялі структуры, звязаныя з расейскім бізнэсоўцам Яўгенам Прыгожыным. Паведамленняў пра якія-небудзь іх дзеянні ў сувязі з цяперашнім становішчам у Судан пакуль не паступала.