У Расеі скасавалі развітанне з Сяргеем Дарэнкам
- 12.05.2019, 11:03
- 24,664
Паступіла інфармацыя пра тое, што журналіст мог быць атручаны.
Развітанне з галоўным рэдактарам радыёстанцыі «Гаворыць Масква» Сяргеем Дарэнкам 12 траўня не адбудзецца. Паліцыя забараніла выдаваць цела ўдаве журналіста праз неабходнасць правядзення паўторнай судова-медыцынскай экспэртызы, паведамляецца на сайце радыёстанцыі.
Дарэнку павінны былі пахаваць на Траякураўскіх могілках, аднак пасля просьбы Ксеніі і Кацярыны Дарэнак (дачок журналіста ад першага шлюбу) была прынятая пастанова аб скасаванні пахавання. Як сцвярджаюць дзяўчаты, журналіст мог быць атручаны.
Са слоў начальніка бюро судова-медыцынскай экспэртызы, галоўнага судмедэкспэрта Масквы Сяргея Шыгеева, ускрыццё праводзілася ў дзень смерці журналіста. Устаноўлена, што ён памёр ад натуральных прычын.
Як раней заяўляла РБК Кацярына Дарэнка, яна напісала заяву ў паліцыю з просьбай правесці праверку прычын смерці бацькі. Цяперашняя жонка Дарэнкі - «зацікаўленая асоба» ў смерці журналіста, заяўляла Кацярына.
Сяргей Дарэнка загінуў 9 траўня ў Маскве, знаходзячыся за стырном свайго матацыкла. Журналісту было 59 гадоў. Згодна з афіцыйным заключэннем судова-медыцынскай экспэртызы, Дарэнка памёр ад разрыву аорты.
Пасля ДТЗ тэлеканал «360» апублікаваў відэакадры з месца здарэння. На кадрах бачна, што матацыкл, якім кіраваў Дарэнка, ехаў па крайняй правай паласе, аднак раптам выехаў на сустрэчную паласу і ўпаў.