Прадпрымальнікі запатрабавалі спыніць масавыя праверкі

У беларускіх ІП ва ўсёй краіне адбіраюць тавары.

Індывідуальныя прадпрымальнікі, якія прадаюць тавары лёгкай прамысловасці, месяц назад напісалі зварот у адміністрацыю Лукашэнкі, у якім прасілі «спыніць масавыя праверкі Дзяржстандарту». У структуры патлумачылі, чаму прыходзяць да ІП з праверкамі і маніторынгам, паведамляе tut.by.

У Дзяржстандарце тлумачаць, што больш за 95% наглядных мерапрыемстваў, якія абласныя інспекцыі Дзяржстандарту правялі ў першым квартале гэтага года ў дачыненні да індывідуальных прадпрымальнікаў, якія гандлююць таварамі лёгкай прамысловасці, - маніторынгі.

«Паводле іх вынікаў суб'ектам гаспадарання пры наяўнасці парушэнняў выдаваліся рэкамендацыі для іх ліквідацыі ў пэўны тэрмін, - удакладнялі ва ўстанове. - Пратаколы аб адміністрацыйных правапарушэннях дзяржінспектарам складаліся ў выпадку ўстанаўлення факту аб не ліквідацыі раней выяўленых парушэнняў».

У астатніх выпадках - блізу 5% ад агульнай колькасці кантрольна-наглядных мерапрыемстваў - да ІП прыходзілі з праверкамі. Пры гэтым падставай для іх была «інфармацыя пра парушэнні заканадаўства або аб фактах узнікнення пагрозы прычынення або прычынення шкоды жыццю, здароўю грамадзян».

У Дзяржстандарце ўдакладняюць, што колькасць праверак у першым квартале гэтага года засталася «практычна на тым жа ўзроўні, што і ў чацвёртым квартале 2018 года».

Нагадаем, у красавіку гэтага года грамадскае аб'яднанне «Перспектыва» звярнулася ў адміністрацыю Лукашэнкі. Прадпрымальнікі скардзіліся, што «практыка праваўжывання заканадаўства ў стандартызацыі і сертыфікацыі паказала, што адпаведныя пацвярджальныя дакументы, якія прадстаўляюцца пастаўшчыкамі краін МС, не прымаюцца да ўвагі прадстаўнікамі Дзяржстандарту».

«Тавары масава канфіскоўваюцца ў прадпрымальнікаў для правядзення экспэртызы, вынікі якой часцяком адмоўныя. Гэта цягне накладанне буйных штрафаў, выстаўленне буйных сум за экспэртызу тавару, судовыя выдаткі, што вядзе да разарэння прадпрымальнікаў і павелічэння напружанасці ў грамадстве», - напісалі прадпрымальнікі ў сваім звароце ў адміністрацыю Лукашэнкі.

Прадпрымальнікі прасілі «спыніць масавыя праверкі Дзяржстандарта і суды над бізнэсам».