У Празе 50 тысяч чалавек выйшлі на антыўрадавую дэманстрацыю

Прэм'ер-міністра Андрэя Бабіша выклікалі на тэледуэль.

Блізу 50 тысяч чалавек сабраліся на Вацлаўскай плошчы ў Празе з патрабаваннем адстаўкі міністаркі юстыцыі Марыі Бенешавай, якую ўважаюць за паплечніцу прэм'ер-міністра Андрэя Бабіша.

Пра гэта паведамляе «Еўрапейская праўда» са спасылкай на выданне Hospodarske Noviny.

Прамовы на дэманстрацыі, скліканай з патрабаваннем адстаўкі Бенешавай, перараслі ў агульную крытыку ўрада і прэм'ера Андрэя Бабіша і абвінавачванняў апошняга ў канфлікце інтарэсаў.

Мікулаш Мінар, лідар аб'яднання «Мільён момантаў за дэмакратыю», якая выступала арганізатарам дэманстрацыі, выклікаў Бабіша на тэледуэль, а ў выпадку ягонай адмовы паабяцаў пратэсты ў наступныя два аўторкі.

У многіх удзельнікаў дэманстрацыі былі плакаты з патрабаваннем адстаўкі Бабіша.

Гэта была ўжо чацвёртая такая акцыя.

Нагодай для дэманстрацый стаў намер міністаркі юстыцыі Марыі Бенешавай правесці рэформу пракуратуры і скасаваць пасаду Генеральнага пракурора. Менавіта Генеральны пракурор павінен прыняць пастанову аб перадачы ў суд крымінальнай справы ў дачыненні да Бабіша, які патэнцыйна можа паўстаць перад судом за махлярства са сродкамі ЕЗ.

Бенешава з'яўляецца адвакатам і дарадцам прэзідэнта Мілаша Зэмана, блізкага хаўрусніка Бабіша. Зэман неаднаразова крытыкаваў абвінавачванні.