Эканаміст аб новай прапанове ўладаў: Папулізм, асуджаны на правал

Урад не стварае эфектыўную эканоміку, а толькі дзеліць тое, што ёсць.

У інтэрв'ю тэлеканалу «Беларусь 1» першы віцэ-прэм'ер Аляксандр Турчын паведаміў, што ўлады маюць намер узяцца за прадпрыемствы, на якіх сярэдні заробак не дацягвае да 400 рублёў. А з наступнага года возьмуцца за прадпрыемствы, дзе сярэдні заробак не дацягвае да 500 рублёў, паведамляе «Белсат».

Турчын адзначыў, што ўладу хвалююць кампаніі, якія плацяць сваім работнікам нізкія заробкі. Такія прадпрыемствы ўрад будзе «вельмі жорстка» кантраляваць.

«Першы этап - арганізацыі, якія плацяць людзям менш за 400 рублёў. Мы паставілі задачу, каб да 1 ліпеня такіх прадпрыемстваў не было», - адзначыў першы віцэ-прэм'ер.

На думку Турчына, у гэтай справе трэба ўлічыць два складнікі - эфектыўную работу і кіраўніцкія пастановы.

«Калі вы бачыце, што прадпрыемства не можа нармальна працаваць, то прымайце кіраўніцкую пастанову: далучайцеся, прадавайце, ліквідуйце. Пры гэтым безумоўна працаўладкуйце людзей. Але плаціць такі заробак недапушчальны», - кажа Турчын.

Першы віцэ-прэм'ер таксама адзначыў, што міністру падаткаў і збораў далі заданне праверыць, ці легальна выплачваецца заробак на прадпрыемствах або «ў канвертах».

З 1 студзеня 2020 года ўрад мае намер узяцца за прадпрыемствы, на якіх сярэдні заробак не дацягвае да 500 рублёў.

Эканаміст Леанід Злотнікаў у гутарцы з belsat.eu адзначыў, што задача пазбавіцца ад нізкааплатных працоўных месцаў выглядае нерэальнай і такога кшталту заявы можна ўважаць за звычайны папулізм.

«Адкуль яны возьмуць гэтыя грошы? Трэба, каб прадпрыемства стваралі больш дададзенай вартасці, каб прадукцыйнасць працы расла, каб эканоміка стварала больш прадуктаў. Тады прадпрыемствы неяк ужо размяркуюць грошы паміж работнікамі. А калі ўрад не стварае эфектыўную эканоміку, а толькі дзеліць тое, што ёсць - гэта папулізм, асуджаны на правал», - адзначае экспэрт.