WSJ: Сёння Пуцін не ў стане дасягнуць ніводнай са сваіх мэтаў

Не варта рабіць за кіраўніка РФ ягоную працу.

Расейскі прэзідэнт Уладзімір Пуцін марыць аб тым, каб Злучаныя Штаты на ўласную волю аслабілі адно са звёнаў нашай ядзернай трыяды - субмарыны. Размяшчэнне на іх ядзерных зарадаў паніжанай магутнасці прывядзе да паслаблення амерыканскага падводнага флоту, піша ў артыкуле для The Wall Street Journal Джым Купер (Jim Cooper), дэмакрат, чалец Палаты прадстаўнікоў Кангрэсу ЗША ад штата Тэнэсі (пераклад - inosmi.ru).

Сэнс сённяшніх спрэчак з нагоды ядзернай зброі паніжанай магутнасці палягае ў захаванні нашай здольнасці абараняць нашы ядзерныя субмарыны, найбольш каштоўны складнік нашай ядзернай трыяды, якая валодае самай высокай выжывальнасцю. Рэспубліканец Майк Tэрнер (Mike Turner) у каментары «Небяспечны план у абмежаванні амерыканскіх ядзерных зарадаў» (A Dangerous Plan to Limit US Nukes; «Уол-стрыт джорнэл», 7 чэрвеня) зручным для сябе чынам абыходзіць пытанне аб тым, што Злучаныя Штаты ўжо маюць шматлікія сотні ядзерных зарадаў малой магутнасці, - сотні з іх разгорнутыя для выкарыстання Вайскова-паветранымі сіламі ЗША. Пытанне ў тым, ці варта ўпершыню разгарнуць некаторую дадатковую іх колькасць на субмарынах Вайскова-марскіх сіл ЗША.

Расейскі прэзідэнт Уладзімір Пуцін марыць аб тым, каб Злучаныя Штаты з уласнай волі аслабілі адно са звёнаў нашай ядзернай трыяды - субмарыны. Разгортванне ядзерных зарадаў паніжанай магутнасці аслабіць нашы субмарыны ў двух кірунках: 1) за кошт выкарыстання пускавых шахтаў для менш эфектыўных, менш дакладных ракет і 2) такім чынам будуць падстаўленыя пад контрудар нашы бясцэнныя субмарыны. Сёння Пуцін не ў стане дасягнуць ніводнай з гэтых мэтаў, але абедзве яны стануць магчымымі, калі Кангрэс зробіць гэта для яго.

Дэбаты з нагоды зарадаў паніжанай магутнасці звычайна адбываюцца паміж тымі людзьмі, якія хочуць мець больш такога кшталту ўзбраенняў або наогул не мець. Але сёлета прадмет гэтых спрэчак іншы. Кангрэс у апошнія некалькі гадоў прагаласаваў на дзвюхпартыйнай аснове за стварэнне ядзерных зарадаў паніжанай магутнасці для субмарын. Злучаным Штатам выгадна мець шмат варыянтаў перад тварам расейскай рыторыкі аб «эскалацыйным дамінаванні», а таксама прымушаць нашых патэнцыйных праціўнікаў гадаць з нагоды наяўных у нашым распараджэнні магчымасцяў. Але адна справа мець на руках зброю, а іншая - выхваляцца ёй. Напраўду разгортванне боезарадаў паніжанай магутнасці на субмарынах азначае выбар на карысць сімвалічнай гнуткасці ў агнявой моцы на шкоду выжывальнасці нашага флоту.

Захаванне ключавога звяна нашай трыяды - справа значна больш важная.