Паводкі ў Сібіры: пад вадой ужо тыдзень знаходзяцца некалькі гарадоў

МНС РФ абвясціла набор добраахвотнікаў для ліквідацыі наступстваў паводкі.

Загінулі, паводле афіцыйных звестак, пяць чалавек, яшчэ двое прапалі без вестак. Больш за тысячу чалавек эвакуаваны. Паводле інфармацыі Міністэрства аховы здароўя рэгіёну, у сувязі са стыхіяй шпіталізаваны 130 чалавек. Усяго па медыцынскую дапамогу звярнуліся больш за 600 чалавек, паведамляе svoboda.org.

У выніку паводкі, якая доўжыцца ў Іркуцкай вобласці ўжо тыдзень, затопленымі апынуліся больш за 4 тысячы жылых дамоў. У горадзе Тулун з насельніцтвам 41 тысяча чалавек, дзе рака Ія выйшла з берагоў і прарвала дамбу, падтоплены 900 дамоў. За апошнія дні з прыватных дамоў у Тулун эвакуаваны больш за 100 жывёл. Загінуць тут магло блізу 600 галоў жывёлы.

Усяго ад стыхіі пацярпелі больш за 50 населеных пунктаў. У некалькіх раёнах паводка падтапіла водазаборы, якія забяспечвалі горада пітной вадой. На затопленай тэрыторыі знаходзяцца могілкі, жывёльныя могільнікі і ачышчальныя збудаванні, таму існуе рызыка распаўсюджвання інфекцый.

Улады арганізуюць дастаўку пітной вады.

Амаль 30 тысяч чалавек у зоне бедства застаюцца без электрычнасці.

Міністэрства ў надзвычайных сітуацыях абвясціла набор добраахвотнікаў для ліквідацыі наступстваў паводкі. Запрашаюць людзей з розным досведам і добра экіпіяваных.

У ноч на нядзелю Уладзімір Пуцін на шляху з Японіі, дзе прайшоў саміт Вялікай дваццаткі, наведаў Іркуцкую вобласць і правёў нараду ў сувязі з паводкай.

Некаторыя расейскія СМІ са спасылкай на паведамленне ТАСС раніцай у нядзелю паведамілі, што пасля візіту Пуціна ўзровень вады ў Тулун стаў зніжацца.

24 чэрвеня ў Іркуцкай вобласці пачаліся ліўні, пасля чаго пачаў імкліва расці ўзровень вады ў рэках Уда, Ангара, Вялікая Белая, Ія, Ака, Біруса ды Іркут. У сераду раніцай затопленымі апынуліся сотні кіламетраў, а рэкі ў некаторых месцах сталі на тры метры вышэйшыя за крытычную адзнаку. Мясцовыя жыхары кажуць, што паводкі такой сілы тут не было некалькі дзесяткаў гадоў.

Ва ўсёй Іркуцкай вобласці ўвялі рэжым надзвычайнай сітуацыі.