Алег Слабадзян: Украіне трэба надаць увагу ўмацаванню межаў з Беларуссю

«Паўночны плацдарм» цесна звязаны вайсковым хаўрусам з РФ.

Пра гэта ў інтэрв'ю Charter97.org заявіў прэс-сакратар Дзяржаўнай памежнай службы Украіны Алег Слабадзян, які прыняў пастанову балатавацца ў Вярхоўную Раду Украіны ад партыі Ігара Смяшко «Сіла і гонар».

- Вы – украінскі афіцэр, палкоўнік памежнай службы. Чаму вы наважылі ісці ў народныя дэпутаты Украіны?

- Па-першае, чыста арганізацыйна, у мяне заканчваецца апошні кантракт, які я падпісваў з Дзяржпамежслужбай Украіны, і мне варта было вызначыцца: заканчваю я службу або прадаўжаю яе. Я наважыў кантракт не прадаўжаць і развівацца ў некалькі іншым накірунку.

А што тычыцца менавіта палітычнага складніка, то апошнія пяць гадоў былі вельмі цяжкімі і для Украіны, і для тых людзей, якія сапраўды шчыра і горача перажываюць за будучыню краіны. Я сябе як раз адношу да такіх людзей. Я вельмі блізка і хваравіта перажываў за ўсё тое, што адбываецца і адбывалася на тэрыторыі Украіны. І я ў гэтай сітуацыі не магу заставацца ў баку ад тых працэсаў, якія адбываюцца, якія я бачу і якія мяне хвалююць.

Таму, зыходзячы з усяго багацця выбару, каб быць найбольш эфектыўным на далейшай ніве службы Украіне, я выбраў палітычную сцежку і партыю «Сіла і гонар» Ігара Смяшко.

- Чаму вы выбралі менавіта гэтую партыю?

- На дзве прычыны. Па-першае, гэтая партыя падтрымлівае вайскоўцаў і ў будучым парламенце будзе рабіць для гэтага ўсё неабходнае.

І другая прычына: адзін з прыярытэтаў партыі «Сіла і гонар» - гэта праца на сярэдні клас. І гэта я ўважаю за важную палітычную місію, у тым ліку для сябе, бо цяпер ва Украіне вельмі слабы сярэдні клас, і калі мы здолеем развіць яго патэнцыял і ў краіне будзе моцны сярэдні клас, то тады і эканамічная складнік у нас будзе развівацца паспяхова і хутка.

- Што яшчэ вы плануеце змяніць у краіне, калі станеце дэпутатам Вярхоўнай Рады? Якія законапраекты варта прыняць у першую чаргу?

- Гэта закладзена ў ідэалогіі і праграме партыі «Сіла і гонар». Ва ўкраінскім грамадстве ёсць запыт на абнаўленне палітыкума, але, з іншага боку, працаваць над пераменамі ў краіне павінны прафесіяналы.

Таму наша партыя выступае з пазіцыі таго, што ў парламенце і на кіроўных пасадах павінны быць прафесіяналы і патрыёты, якія перш за ўсё сумленна выконваюць сваю працу.

Што тычыцца першачарговых ініцыятыў, то, вядома, у першую чаргу мы будзем падтрымліваць тыя з іх, якія працуюць на Украіну і яе будучыню.

Мы ні ў якім разе не будзем супрацоўнічаць з прарасейскімі партыямі, будзем аб'ядноўваць і падтрымліваць толькі тыя сілы і тыя пастановы, якія спрыяюць і аднаўленню тэрытарыяльнай цэласнасці Украіны, і развіццю эканомікі нашай краіны.

Такімі законапраектамі могуць быць пастановы аб падтрымцы сярэдняга класа, аб стымуляванні людзей для таго, каб яны адкрывалі свой бізнэс. Гэта могуць быць «падатковыя канікулы» і іншыя заканадаўчыя пастановы, якія дазволяць сярэдняму класу ўпэўнена адчуваць сябе ў дзяржаве і спакойна глядзець у будучыню.

У гэтай жа сувязі хачу назваць законапраекты аб падтрымцы Узброеных Сіл Украіны, аб празрыстай сістэме сацыяльнага забеспячэння вайскоўцаў, аб будаўніцтве і забеспячэнні вайскоўцаў жыллём, аб падвышэнні заробку для вайскоўцаў, бо прэстыж войска ва Украіне расце і гэта – поспех, які трэба ўмацоўваць.

- Як вы мяркуеце, ці неабходна даць украінскае грамадзянства і сацыяльную падтрымку замежнікам, якія добраахвотнікамі ваююць за Украіну на Данбасе?

- Адназначна - так. І радуе тое, што прэзідэнт Уладзімір Зяленскі ўжо зрабіў такі крок, і ўжо больш за 10 чалавек з ліку замежнікаў, якія ваююць на баку Украіны, атрымалі грамадзянства нашай краіны.

Мы адназначна будзем падтрымліваць гэтую ініцыятыву, і калі людзі пралівалі і праліваюць кроў за Украіну, яны маюць поўнае права на атрыманне грамадзянства.

- Што, на вашу думку, варта было б змяніць ва ўкраінскай палітыцы ў дачыненні да Беларусі?

- Наколькі мне вядома, унутрыпалітычная кан'юнктура ў самой Беларусі цяпер нестабільная. У вашай краіне таксама адбываюцца рознавектарныя працэсы, у тым ліку, у дачыненні да Украіны.

Што тычыцца міждзяржаўных стасункаў, то я думаю, што неабходна захоўваць пазітыў там, дзе ён ёсць, і ў той жа час быць дыпламатычнымі, але жорсткімі ў тых пытаннях, дзе ёсць працэсы, якія могуць закранаць інтарэсы Украіны.

Як памежнік, магу сказаць адназначна: нам трэба надаць увагу ўмацаванню межаў з Беларуссю. Сюды ўваходзіць і дэмаркацыя, і інжынернае ўладкаванне гэтага кірунку, бо на ім узнікла занадта шмат пытанняў, і надзейна ўмацаваная мяжа з Беларуссю дазволіць нам адчуваць сябе нашмат спакайней.

- Ці можна казаць пра тое, што цяпер «беларускі балкон» уяўляе для Украіны сур'ёзную пагрозу з паўночнага кірунку?

- Беларусь шчыльна звязаная з Расейскай Федэрацыяй у рамках «саюзнай дамовы». І ў першую чаргу гэта супрацоўніцтва тычыцца яскрава выяўленага вайсковага складніка. І з пункту гледжання пагрозы для Украіны, вядома ж, трэба звяртаць пільную ўвагу на супрацоўніцтва Беларусі і РФ у вайсковай сферы.

Так, да вучэнняў «Захад – 2017» была прыкаваная ўвага не толькі Украіны, але і краін NATO.

Усе прыйшлі да адной і той жа высновы: Расейская Федэрацыя на тых вучэннях адпрацоўвала стратэгію далейшага наступу на заходнім кірунку. Таму для Украіны недаацэньваць «паўночны плацдарм» і магчымыя варыянты развіцця ваенных дзеянняў з улікам Беларусі было б вялікім глупствам.

- Як у сувязі з гэтым вы ацэньвае пастанову Генштаба Украіны стварыць на мяжы з Беларуссю дзве дадатковыя брыгады - танкавую і егерскую?

- Украіна знаходзіцца ў тым стане, калі абароны шмат не бывае. Таму разгортванне новых частак і падраздзяленняў, у тым ліку і на поўначы, гаворыць аб тым, што мы прадаўжаем развіваць наша войска і правільна ацэньваем пагрозы.

Калі вам спадабаўся артыкул, вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL 97 1160 2202 0000 0002 1671 1123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com