Знойдзены вытворца батарэі для «Лашарыка», якая выбухнула

Тэхнічныя паказчыкі ўсталяваных на падлодку батарэй горшыя, чым у фірмаў-канкурэнтаў.

Вытворцам літыева-іённай батарэі, няспраўнасць якой стала прычынай гібелі часткі экіпажа сакрэтнай падлодкі АС-31 «Лашарык» 1 ліпеня, амаль гарантавана была пецярбуржская кампанія «Рыгель», сцвярджае «Фонтанка».

Выданне знайшло дзяржкантракт, адпаведна з якім, хутчэй за ўсё, і ўсталявалі батарэю.

Два кантракты амаль на 500 млн рублёў былі ўкладзеныя паміж «Сеўмашам» (рамонтнае прадпрыемства) і КБ «Малахіт» (распрацоўшчык АС-31) 17 снежня 2015 года. Паводле звестак РБК, «Лашарык» мадэрнізавалі ў 2016 годзе. «Фонтанка» сцвярджае, што кантракт можна адназначна ідэнтыфікаваць з «Лашарыкам» у пазначэнні праекта, завадскога нумара і вайсковай часткі.

«Рыгель» на ўласным сайце піша, што ў 2007 годзе распрацаваў і выпрабаваў літыевыя батарэі для глыбакаводных апаратаў.

«Рыгель» - даўні падрадчык «Малахіту», распрацоўніка шматмэтавых падлодак для расейскага ВМФ. Пра тое, што КБ працавала з «Рыгелем» і па тэматыцы глыбакаводных апаратаў, сведчаць кантракты аб сістэме тушэння ўзгарання літыевых батарэй і кантракт ад 2015 года аб дапрацоўцы вырабы «ЦІ-443 пасля доследнай эксплуатацыі», піша «Фонтанка». Батарэя ўсталёўвалася на падобную на «Лашарык» субмарыну, сцвярджае рэсурс.

Вырабу ЦІ-443 няма ў спісе прадукцыі «Рыгеля», але яго найменне падобнае на наменклатуру прадпрыемства. Акрамя таго, на сайце гаворыцца, што ў 2008 годзе завод распрацаваў батарэю на 1000 А/г.

На сайце канкурэнта - новасібірскага «Ліатэха» - пазначана, што тэхнічныя паказчыкі батарэй «Рыгеля» горшыя, чым у канкурэнтаў. «Ліатэх», створаны пры ўдзеле «Раснана», уважаецца за адзіны сучасны серыйны завод літыевых батарэй у Расеі. Усе астатнія робяць дробныя партыі акумулятараў для абароннай прамысловасці.

«Ёй там не месца»

У адкрытым доступе ёсць пратакол выпрабавання параўнальна невялікай літыевай батарэі «Рыгеля» (50 А/г). Яна вытрымала кароткае замыканне без разбурэння корпуса, хоць і нагрэлася да 150 градусаў. Але пры разбурэнні яна дала слуп распаленых газаў з тэмпературай 500 градусаў.

Высокая пажаранебяспека пры немагчымасці тушэння вадой - галоўны і відавочны недахоп літыевых акумулятараў. Адзіная краіна, якая адважылася выкарыстоўваць іх як асноўны акумулятар субмарын, - Японія. Праўда, там працы ў гэтым кірунку вяліся некалькі дзесяцігоддзяў.

«Я думаю, ніхто б гэтую батарэю туды не паставіў. Калі паставілі, то ідыёты. Выбачайце, сумняваюся, што туды нехта паставіў гэтую батарэю. Ёй там не месца, яна там не патрэбная», - цытуе «Фонтанка» аднаго з былых кіраўнікоў прадпрыемства. Каментары цяперашняга кіраўніцтва і вайсковай прыёмкі выданне атрымаць не здолела.

Паводле звестак «Фонтанки», кароткае замыканне літыевай батарэі адбылося пры стыкоўцы падлодкі з АПЛ-носьбітам. Загінуў асабісты склад насавых адсекаў, ацалелыя задраілі цэнтральны пост, скончылі стыкоўку, заглушылі атамны рэактар і эвакуяваліся на носьбіт. Чацвёра гідранаўтаў пасмяротна ўзнагароджаныя зоркай Героя Расеі, дзесяць чалавек - ордэнамі Мужнасці. Падводнікі пахаваныя на Серафімаўскіх могілках у Пецярбургу.