Сталі вядомыя магчымыя спаборнікі БАТЭ ў 3-м коле кваліфікацыі да Лігі чэмпіёнаў і Лігі Еўропы

Матчы трэцяга кваліфікацыйнага раунда запланаваныя на жнівень.

У швэйцарскім Ньёне скончылася лёсаванне трэцяга кваліфікацыйнага этапу футбольнай Лігі чэмпіёнаў. Магчымымі спаборнікамі БАТЭ сталі славенскі «Марыбор» і швэдскі АІК. Чэмпіёны Беларусі згуляюць з пераможцамі гэтага супрацьстаяння, піша tut.by.

Для таго, каб прайсці ў трэці кваліфікацыйны раунд, барысаўцам трэба падолець па суме двух матчаў нарвежскі «Русенборг». Першая гульня гэтых каманд адбудзецца ўжо ў сераду.

Матчы трэцяга кваліфікацыйнага кола запланаваныя на 6/7 і 13 жніўня.

Для выхаду ў групавы этап Лігі чэмпіёнаў трэба пераадолець чатыры раунды.

Калі ж БАТЭ саступіць, то сустрэнецца з баснійскім клубам «Сараева» ў трэцім кваліфікацыйным этапе Лігі Еўропы.