Як будуць налічваць «камуналку» тым, хто трапіў у базу «дармаедаў»

Многія беларусы трапілі ў базу звестак «не занятых у эканоміцы» памылкова.

У Беларусі яшчэ зімой былі сфармаваныя базы звестак людзей, якія не былі заняты ў эканоміцы краіны. У народзе яе назвалі «базай дармаедаў». І ўжо са студзеня некаторыя грамадзяне, якія апынуліся ў ёй, пачалі плаціць за гарачую ваду павышанымі тарыфамі. База абнаўляецца кожныя тры месяцы. Пры гэтым, як адзначаюць спецыялісты, яна поўнасцю не вывераная, некаторыя людзі могуць там апынуцца памылкова, піша «Вечерний Брест». Ці шмат берасцейцаў у базе дармаедаў, колькі чалавек адтуль ужо было выключана і ці магчымае вяртанне пераплачаных сум за ЖКП, калі памылкова апынуліся ў базе?

Базу звестак фармуе Міністэрства працы і сацыяльнай абароны, затым даводзіць да камісій каардынацыі работы ў садзейнічанні занятасці насельніцтва. Спецыялісты гэтых камісій інфармуюць людзей пра тое, што яны патрапілі ў гэтую базу, а таксама правяраюць адпаведнасць звестак рэчаіснасці. Гэта даволі няпроста.

- Мы абзвоньвалі ўсіх людзей у базе, высылалі лісты з паведамленнем. У лісце паведамленне пра тое, што чалавек знаходзіцца ў гэтай базе, і пазначаны кантакты, праз якія можна даведацца падрабязную інфармацыю, рэкамендацыі пра тое, што зрабіць, каб не лічыцца дармаедам. Бывала, мы і па 5 разоў высылалі аднаму і таму ж чалавеку ліст з паведамленнем пра тое, што ён у гэтай базе, з просьбай адгукнуцца - але дарэмна. Інфармуюць грамадзян і работнікі ЖЭСаў: упісваюць інфармацыю ў рахункі, па кватэрах ходзяць. Але і гэта не заўсёды прыносіць вынік, - распавядае сакратарка пастаянна дзейнай камісіі ў каардынацыі работы для садзейнічання занятасці насельніцтва пры адміністрацыі Ленінскага раёна Ірына Грыгарук.

Сёння амаль 23 тысячы берасцейцаў знаходзяцца ў базе незадзейнічаных у эканоміцы вобласці. Пры гэтым з пачатку года амаль 5 тысяч былі з яе выключаны, бо падалі камісіям патрэбныя дакументы. Як тлумачаць спецыялісты, спісы ўвесь час адпрацоўваюцца. І раз на тры месяцы ідзе іх падача ў ЖКГ, дзе ўжо для тых, хто стаіць у гэтай базе, налічваюць падвышаны тарыф за гарачую ваду.

- Большая частка людзей, якія знаходзяцца ў базе, працуюць за мяжой. У нас няма звестак аб іх занятасці. Калі б людзі проста прынеслі, выслалі па пошце або факсе дакументы з указаннем месца працы - яны былі б выключаны з гэтай базы. Нас цікавіць толькі дакумент, які пацвердзіць, што чалавек працуе за мяжой, - тлумачыць сакратар сталай дзейнай камісіі пры адміністрацыі Ленінскага раёна Таццяна Амельянюк.

У той жа час, калі хтосьці апынуўся ў базе выпадкова, а яму прыйшоў рахунак з поўным коштам за гарачую ваду і ён яго аплаціў, - магчымы пераразлік і вяртанне пераплачаных сродкаў. Але толькі ў тым выпадку, калі чалавек даказаў сваё памылковае ўключэнне ў базу.

Ужо да наступнага кварталу яго выкрасляць са спісаў, калі ён па-ранейшаму будзе працаваць. Тыя, хто ў базе, не толькі плацяць за гарачую ваду павышаным тарыфам. З 1 сакавіка спісы з базы незадзейнічаных у эканоміцы краіны людзей падаюцца ў аддзел уліку і размеркавання жылля: дармаеды не змогуць атрымаць субсідыю дзяржавы на куплю або будаўніцтва нерухомасці. Таксама з 1 кастрычніка акрамя аплаты ў поўным аб'ёме гарачай вады дадасца і 100-адсоткавая аплата за ацяпленне і газазабеспячэнне. А значыць, рахунак для кагосьці зноў значна «пацяжэе».