Зяленскі даў інтэрв'ю пра свае 100 дзён актору з серыяла «Слуга народа»

У анонсе гаворыцца, што «ва ўкраінцаў з'явілася вельмі шмат пытанняў» да прэзідэнта.

Тэлеканал «1 + 1» пакажа запісанае інтэрв'ю з прэзідэнтам Украіны Уладзімірам Зяленскім, прысвечанае 100 дням яго працы, 31 жніўня.

Анонс праграмы размешчаны на сайце тэлеканалу, ён таксама быў распаўсюджаны ў сацсетцы студыяй «Квартал 95».

На відэаанонсе актор Станіслаў Баклан, які выконваў ролю ў серыяле «Слуга народа», звяртаецца да кіраўніка ўкраінскай дзяржавы:

«Добры дзень, спадар прэзідэнт Галабаро... Прабачце. Зяленскі. Гэта я, ваш былы прэм'ер-міністр».

Актор удакладняе, што за 100 дзён прэзідэнцтва Зяленскага, «ва ўкраінцаў з'явілася вельмі шмат пытанняў».

«Напрыклад, што вы ўжо зрабілі для краіны за гэты час. Што вы будзеце рабіць з усёй той уладай, якую атрымалі пасля парламенцкіх выбараў. Якія смс вам піша Каламойскі і што Андрэй Богдан пастаянна шэпча вам на вуха», - кажа Баклан.

У прэс-службе прэзідэнта «Украинской правде» пацвердзілі, што інтэрв'ю ўжо запісанае.

«Там будуць ставіцца пытанні, якія хвалявалі грамадства», - сказала прэс-сакратарка прэзідэнта Украіны Юлія Мендэль.

На ўдакладняючае пытанне пра анансаваную яшчэ ў чэрвені вялікую прэс-канферэнцыю Зяленскага, там запэўнілі, што яна будзе пазней.

«Гэта не значыць, што прэс-канферэнцыі не будзе. Паколькі прэзідэнт гэтыя 100 дзён не меў магчымасці для паўнавартаснай працы, мы чакаем, пакуль запрацуе парламент, будуць падтрыманыя заканадаўчыя ініцыятывы кіраўніка дзяржавы, будуць вынікі і тады прэс-канферэнцыя будзе праведзеная. Паспрабуем хутчэй. Магчыма, нават восенню», - адзначыла Мендэль.