Памёр аўтар здымка «Невядомы бунтар» на плошчы Цяньаньмэнь
3- 13.09.2019, 21:14
- 13,082
Фотажурналісту Чарлі Коўлу было 64 гады.
Памёр фотажурналіст Чарлі Коўл – лаўрэат прэміі World Press Photo за здымак «невядомы бунтар». Коўлу было 64 гады, паведамляе svoboda.org.
Фатаграфія зроблена з балкона гатэля на плошчы Цяньаньмэнь падчас студэнцкіх пратэстаў у Пекіне 5 чэрвеня 1989 года. На здымку выяўлены чалавек, які стаіць перад калонай танкаў. Імя чалавека і яго лёс невядомыя. СМІ адзначаюць, што «невядомы бунтар» стаў сімвалам негвалтоўнай барацьбы. У Кітаі і фота, і інфармацыя пра студэнцкія пратэсты знаходзяцца пад забаронай.
4 чэрвеня 1989 года шматдзённыя пратэсты ў Пекіне скончыліся жорсткім сілавым разгонам дэманстрантаў. Кітайскія ўлады ўжылі цяжкую вайсковую тэхніку. Паводле афіцыйных звестак, загінула блізу 250 чалавек. Незалежныя назіральнікі сцвярджаюць, што загінулых можа быць больш за тысячу.