Трамп і Дуда дамовіліся пашырыць вайсковы кантынгент ЗША ў Польшчы

Прэзідэнты падпісалі дэкларацыю пра пашырэнне вайсковага супрацоўніцтва.

Прэзідэнты ЗША і Польшчы Дональд Трамп і Анджэй Дуда ў рамках сустрэчы ў Нью-Ёрку, дзе ў гэтыя дні пачынаецца агульнапалітычная дыскусія на 74-й сесіі Генеральнай асамблеі ААН, падпісалі дэкларацыю пра пашырэнне супрацоўніцтва ў сферы абароны. Пра гэта паведамляе Польскае агенцтва друку са спасылкай на тэкст дакумента.

У ім гаворыцца, што краіны прадаўжаюць працу над планам умацавання ваенных сувязяў, а таксама «амерыканскіх магчымасцяў абароны і стрымлівання ў Польшчы». У ім удакладняецца, што ў найбліжэйшы час амерыканскі кантынгент, які цяпер налічвае 4,5 тыс. вайскоўцаў, будзе павялічаны яшчэ на 1 тыс.

Згодна з дэкларацыяй, штаб-кватэра цэнтра баявога навучання, які будуць выкарыстоўваць вайскоўцы ЗША і Польшчы, размесціцца ў горадзе Драўска-Паморскім. Ва Уроцлаве будзе размешчаная авіяцыйная база для пагрузкі і разгрузкі самалётаў амерыканскіх ВПС, у Познані будзе размяшчацца дывізіён камандавання, а таксама група падтрымкі пяхоты ЗША. У Повідзе размесцяць штаб-кватэру авіяцыйнай баявой брыгады, батальён лагістычнай падтрымкі і аб'ект сілаў спецназу, які акрамя іншага будзе выкарыстоўваць яшчэ адзін аб'ект у Люблінцы.

Акрамя таго, як указваецца ў дакуменце, Вашынгтон і Варшава вядуць актыўны дыялог пра выбар найбольш прыдатнага месца для баявой групы бранятанкавай брыгады.

На сустрэчы з Дудам Трамп заявіў, што 1 тыс. вайскоўцаў, пра якую гаворыцца ў дэкларацыі, хутчэй за ўсё, будзе перакінутая з іншых краінаў Еўропы, і ЗША не будуць адпраўляць туды дадатковы кантынгент са свайго мацерыка.

Акрамя гэтага, як паведамляе The Washington Times, амерыканскі прэзідэнт сказаў Дуду, што ЗША дадуць Польшчы права на праграму бязвізавага ўезду, каб палегчыць паездкі паміж краінамі. «Вы можаце паведаміць народу Польшчы і палякам, якія жывуць у ЗША, што прэзідэнт Трамп зрабіў гэта, а ніхто, як вы ведаеце, цягам доўгага часу не мог», – заявіў ён.

У чэрвені Трамп і Дуда дамовіліся, што ЗША размесцяць на тэрыторыі усходнееўрапейскай краіны эскадрыллю выведвальна-ўдарных беспілотнікаў MQ-9, а таксама створаць там пункт высадкі з паветра для забеспячэння перакідання сілаў падчас вучэнняў або ў выпадку надзвычайнай сітуацыі. У канцы жніўня кіраўнік польскага Мінабароны Марыюш Блашчак на супольнай прэс-канферэнцыі з памочнікам прэзідэнта ЗША Джонам Болтанам паведаміў, што Варшава і Вашынгтон дамовіліся пра шэсць месцаў размяшчэння новых падраздзяленняў амерыканскіх войскаў у Польшчы. «У нас ужо ёсць шэсць месцаў. Мы гаварылі пра сёмае месца», – сказаў ён.