Светлагорскі актывіст: Улада цынічна хаваецца за дзяцей
3- 24.09.2019, 12:57
- 11,937
Андрэй Смалянчук звярнуўся ў Камітэт правоў чалавека ААН.
24 верасня светлагорскі эка-актывіст Андрэй Смалянчук звярнуўся з індывідуальнай скаргай у Камітэт правоў чалавека ААН. На міжнародным узроўні ён аспрэчвае пастановы беларускіх судоў з адмовай у правядзенні ў 70-тысячным горадзе мітынгу пратэсту, звязанага з экалагічнай праблемай горада, паведамляе "Гомельская вясна".
У мінулым годзе Андрэй разам з іншымі актывістамі горада заяўляў у раённым цэнтры пратэстную акцыю, аднак атрымаў адмову. Рэч у тым, што ў горадзе дзейнічае пастанова, паводле якой мітынгаваць дазволена ў адзіным месцы - на стадыёне «Папернік». У іншых месцах забаронена, не паслухаешся ўладу рызыкуеш патрапіць пад санкцыі - буйны штраф або арышт да 15 дзён.
Фактычна ў горадзе на права кожнага аб свабодзе мірных сходаў і публічны выказванне думкі накладзенае табу, мяркуе мужчына.
«Улада пасылае нас мітынгаваць на стадыён, а калі мы пагаджаемся, высвятляецца для нас і там няма месца: у гэтыя дні там нібыта праводзяцца дзіцячыя мерапрыемствы. Іншымі словамі, улада цынічна хаваецца за дзяцей, забараняючы нам, дарослым, уголас абмяркоўваць экалагічную праблему горада, звязаную з кітайскім заводам беленай цэлюлозы», - заяўляе Андрэй Смалянчук.
Праваабаронца Леанід Судаленка адзначае, хоць з пачатку года дзеянне ўступілі так званыя «касметычныя» папраўкі ў базавы закон аб масавых мерапрыемствах, якія дазваляюць у некаторых выпадках не прасіць дазвол на правядзенне мірных сходаў, тым не менш сітуацыя ўсё адно цалкам знаходзіцца пад кантролем чыноўнікаў.
«Вядома, што ў нас забараняецца праводзіць некалькі мерапрыемстваў у адным і тым жа месцы. У Светлагорску такім месцам вызначаны стадыён, на якім нешта праходзіць - калі не трэніроўкі спартоўцаў, дык дзіцячыя святы, якія ўлада арганізоўвае, каб не даць сабрацца супраціўнікам завода беленай цэлюлозы. Атрымліваецца замкнёнае кола: права ёсць, а рэалізаваць яго немагчыма», - падкрэслівае праваабаронца.
У скарзе ў КПЧ ААН Андрэй Смалянчук акрамя ўстанаўлення парушэнняў ягоных правоў на мірны сход і выказвання меркавання просіць абавязаць беларускі ўрад змяніць базавы закон і пастанову мясцовых уладаў аб масавых мерапрыемствах такім чынам, каб кожны меў на практыцы магчымасць публічна выступаць у абарону грамадскіх інтарэсаў.
Нагадаем, раней з аналагічных забаронай у Светлагорску мірных акцый пратэстаў у Камітэт правоў чалавека ААН звярнулася праваабаронца Алена Маслюкова, эка-актывісты Таццяна Наскова і Анатоль Змітровіч.