Раман Васілюк: Заўзятары назвалі мяне легендай. Значыць, так і ёсць
2- 7.09.2019, 20:47
- 8,712
Берасцейскае «Дынама» згуляла з беластоцкай «Ягелоніяй» ў развітальным матчы Васілюка.
Берасцейскае «Дынама» саступіла «Ягелоніі» ў хатнім таварыскім матчы - 1:2.
Берасцейцы вялі ў ліку да 88-й хвіліны пасля гола Аляксея Хабленкі, аднак у канцоўцы прапусцілі два галы ад Хесуса Імаса, паведамляе pressball.by.
Гэты паядынак стаў развітальным для легенды беларускага футбола Рамана Васілюка - ён адыграў першы тайм. Сустрэчу на АСК «Брэсцкі» наведаў 5521 глядач.
Нападнік, які завяршыў кар'еру, пасля матчу распавёў, ці ўважае сябе легендай.
- Мяне заўсёды цікавіла: што адчувае чалавек, які забівае чатыры мячы палякам?
- Гэта было даўно. Ужо і не ўспомню. Ужо гісторыя. Напэўна, станоўчыя эмоцыі.
- Самы яркі момант тваёй кар'еры?
- Кар'еры? З нараджэння сям'і, а там ужо па накатанай пайшло. Самым дарагім, напэўна, было ўступіць у гэты дарослы футбол. Дзякуй Нікалаічу Разіну. А так, у цэлым, усё, як трэба.
- Вы ніколі не любілі павышанай увагі да сябе. Як вам далося гэта апошні час падрыхтоўкі да матчу, калі ўсе погляды былі прыкаваныя да вас?
- Не скажу, што цяжка. Адносная «абыякавасць» была. Ужо па накатанай. Трэба - значыць трэба.
- Партнёры і заўзятары называюць цябе легендай. Ці ўважаеш ты сам сябе легендай?
- Я сябе так не называў, заўзятары так назвалі. Значыць, так і ёсць.
- Параза каманды ў канцоўцы не змазала ўражанне ад вечара?
- Ды не, гэта таварыскі матч. Далі пагуляць усім, атрымалася, як атрымалася. У цэлым задаволеныя.
- У будучыні кім сябе бачыце?
- Пакуль праца ёсць, на гэтым і буду рабіць акцэнт. Але з футболам будзе звязана.
- Як хутка цябе хто-небудзь абміне ў спісе бамбардзіраў?
- Не ведаю. Дай бог, але, напэўна, гэта не хутка здарыцца.