23 верасня 2019, панядзелак, 23:40
Мы ў адной лодцы
Рубрыкі

Як Смаленск зноў стаў беларускім: 410 гадоў таму Леў Сапега пачаў аблогу горада

8
Як Смаленск зноў стаў беларускім: 410 гадоў таму Леў Сапега пачаў аблогу горада

Легендарны канцлер ВКЛ вярнуў Смаленск каралевічу Уладзіславу.

Пасля смерці Маскоўскага цара Івана Фёдаравіча Маскоўскі прастол займае Барыс Гадуноў. Сойм Рэчы Паспалітай прызначае Льва Сапегу, легендарнага канцлера ВКЛ і аўтара Статута 1588 года, паслом у Маскву для пацверджання мірнай дамовы. У верасні 1600 года Сапега з Оршы адпраўляецца ў Маскву з мэтай пацвердзіць мірную дамову і падпісаць дзяржаўную унію паміж Рэччу Паспалітай і Маскоўскім княствам, паводле якой каралевіч Уладзіслаў пацвярджаў сваё права на тытул цара Маскоўскага. У сакавіку 1601 года быў падпісаны мір на 20 гадоў, але прапанова ў стварэнні уніі была адпрэчаная, піша vklby.com.

Праз 8 гадоў, у верасні 1609 года, Сапега зноў едзе ў Маскоўскае княства, але ўжо не на чале пасольства, а ў войску, разам з каралём Жыгімонтам Вазам, ён адправіўся пад Смаленск. Леў Сапега ўзначаліў полк, які сфармаваў за ўласны кошт. Пад Смаленскам ён быў да 1611 года, аблажыўшы і ўсё ж такі ўзяўшы горад, пасля Сапега вяртаецца ў Вільню.

У 1612 годзе ён зноў адправіцца на вайну з Масквой, разам з Карлам Хадкевічам і каралём Жігімонтам. Аднак страчаны час і апалчэнне Мініна і Пажарскага не дадуць войскам Рэчы Паспалітай пасадзіць на трон сына Жыгімонта Уладзіслава; пацярпеўшы няўдачу разам з войскамі Леў Сапега вяртаецца дадому.

Другі паход на Маскву ў 1618 годзе, у якім гэтаксама ўдзельнічаў і Сапега, таксама не даў вынікаў. Войскі Уладзіслава не здолелі ўзяць Маскву і іншыя маскоўскія гарады. Вынікам гэтай вайны стала падпісанне дзяулінскага перамір'я, паводле якога да ВКЛ адышоў Смаленск, а да Польшчы Чарнігаў.