NZZ: Швэцыя ўзбройваецца

Скандынаўская краіна ўзмацняе сваю баявую гатоўнасць.

"На фоне ўсё больш правакацыйных паводзін Расеі ў Балтыйскім рэгіёне швэдскія экспэрты ў абароне больш не выключаюць магчымасць узброеных канфліктаў. Таму плануецца сур'ёзнае ўзбраенне войска. Аднак палітыкі ўжо спрачаюцца пра грошы", - піша швайцарскае выданне Neue Zürcher Zeitung (пераклад - inopressa.ru).

"Больш вайсковаабавязаных, новых вайсковых падраздзяленняў, больш самалётаў і падводных лодак: Швэцыя павінна ўзмацніць сваю баявую гатоўнасць, заявіў у сярэдзіне студзеня міністр абароны Петэр Хультквіст, выступаючы на штогадовай канферэнцыі аб бяспецы Folk och Försvar ("Грамадства і абарона"). Сітуацыя з бяспекай у Паўночнай Еўропе, заявіў Хультквіст, у апошнія гады стала настолькі няўстойлівай, што больш нельга выключаць імавернасць вайсковага ціску на Швэцыю аж да нападу. Паводле ягоных слоў, еўрапейскія краіны, якія падтрымліваюць дэмакратыю і адкрытасць, зазнаюць сістэматычныя спробы дэзінфармацыі і маніпуляцыі, а менавіта з боку дзяржаўных і недзяржаўных дзейных асоб, якія імкнуцца да аўтарытарнага грамадскага ўкладу".

"Сацыял-дэмакрат Хультквіст не самотны ў сваім меркаванні, - адзначае аўтар артыкула Рудольф Херман. - Яго падзяляюць таксама кіраўніцтва войска, шматлікія экспэрты ў абароне і палітычная апазіцыя".

"Да падзення жалезнай заслоны традыцыйна нейтральнай краіне, якая стаіць па-за вайсковымі блокамі, наўпрост супрацьстаяў ля Балтыйскага мора магутна ўзброены Савецкі Саюз. Адпаведна вялікія сродкі ўкладваліся ў абарону. Яшчэ ў 1990 годзе Швэцыя выдаткоўвала на абарону 2,6% свайго ВУП або 4,2% дзяржаўных выдаткаў".

Аднак пасля знікнення антаганізму паміж Захадам і Усходам выдаткі на абарону скараціліся да 2017 года да 1,0% ВУП або 2,1% дзяржаўных выдаткаў, адзначае выданне. "Толькі пасля анэксіі Расеяй Крыма ў 2014 годзе і пагаршэння міжнароднай сітуацыі пачало фармавацца ўсведамленне таго, што абарону зноў неабходна ўмацоўваць. З тых часоў Швэцыя зноў увяла ўсеагульную вайсковую павіннасць, а таксама размясціла пастаянныя войскі на востраве Готланд у Балтыйскім моры, хоць, мяркуючы з іх колькасці, яны і маюць хутчэй сімвалічнае значэнне", - гаворыцца ў артыкуле.

Да 2025 года абаронны бюджэт краіны павінен быць павялічаны амаль напалову. З паведамленняў СМІ, гаворка ідзе пра найбуйнейшае павелічэнні бюджэту за некалькі дзесяцігоддзяў. Зрэшты, каментатары адзначаюць, што новы ўзровень выдаткаў на абарону будзе складаць толькі 1,5% ад ВУП.

Швэцыя не з'яўляецца чальцом NАТО, хоць яе дачыненні з альянсам і становяцца ўсё больш шчыльнымі. "Гэта, верагодна, дазваляе палітыкам у сферы бяспекі спадзявацца, што ў крытычнай сітуацыі краіна не застанецца ў адзіноце. Але афіцыйна Швэцыя нейтральная, у яе няма ніякіх пэўных гарантый і яна палітычна не гатовая нават выставіць на абмеркаванне тэму сяброўства ў NАТО", - паказвае Херман.

"Нават калі б у дачыненні да жадання ўступлення ў NАТО прысутнічала ўнутрыпалітычнае адзінства, гэты намер было б няпроста рэалізаваць у сучаснай міжнароднай абстаноўцы. З аднаго боку, Масква ўжо пры найменшых пачынаннях заяўляе аб сваёй гатоўнасці да адкрытай дыскусіі, называе іх "канфрантацыйным крокам" і пагражае "цяжкімі наступствамі".

"З іншага боку - суседская Фінляндыя, таксама не з'яўляецца чальцом NАТО і, аналагічна Швэцыі, пазбягае нават прынцыповай дыскусіі. Cа слоў пэўных аналітыкаў, мае месца маўклівы кансэнсус аб тым, што ніводная з дзвюх краін не пакіне іншую ў адзіноце ў пытанні NАТО. Аднак тое, што пастанова аб уступленні ў альянс у абедзвюх краінах будзе прынята палітычнай большасцю адначасова і таксама ажыццёўленая на фоне чаканай варожай кампаніі Расеі, здаецца вельмі малаверагодным", - мяркуе аўтар артыкула.

Але і акрамя замежнапалітычных складанасцяў абаронная палітыка з'яўляецца ў Швэцыі яблыкам разладу. Кансерватыўная апазіцыя абвінавачвае ўрад у недастатковасці дадатковых сродкаў на абарону. "Перад магчымым павелічэннем бюджэту ўрад мае намер уважліва прааналізаваць фінансавыя патрэбы войска. Але кансерватары мяркуюць, што ва ўсё больш трывожнай абстаноўцы выдача сектару абароны неабходных яму сродкаў з'яўляецца жыццёва важнай абаронай для краіны", - піша Neue Zürcher Zeitung.