Украіна абагнала Расею ў рэйтынгу тэхналагічна развітых краін
2- 20.01.2020, 18:30
- 16,717
Рэйтынг сфармаваны на аснове чатырох паказчыкаў.
Украіна заняла 44-е месца з 67-мі ў рэйтынгу самых тэхналагічна развітых краін і на дзве пазіцыі апярэдзіла Расею.
Рэйтынг, які складае выданне Global Finance, быў абнародаваны напярэдадні, паведамляе «Крым.Реалии».
Украіна абагнала Расею на два пункты, нягледзячы на тое, што яе эканоміка ў 14 разоў меншая за расейскую, адзначылі складальнікі індэкса.
«Магчыма, гэта праз тое, што Украіна з даўніх часоў была цэнтрам тэхналогій былога Савецкага Саюза, і цяпер выбудоўвае сваю адукацыю і бізнэс-інтарэсы з мэтай прасоўвання галіны высокіх тэхналогій», - гаворыцца ў даследаванні.
Расея паказала дрэнныя вынікі паводле ўсіх паказчыкаў уключна з нізкім узроўнем выкарыстання смартфонаў і ўзроўнем канкурэнтаздольнасці ў сферы лічбавых тэхналогій, адзначаюць аўтары рэйтынгу.
Рэйтынг сфармаваны на аснове чатырох паказчыкаў, уключаючы колькасць інтэрнэт-карыстальнікаў у дачыненні да агульнага насельніцтва; долю насельніцтва, якая карыстаецца смартфонамі; адсотак насельніцтва, які карыстаецца LTE, а таксама агульны індэкс канкурэнтаздольнасці ў сферы лічбавых тэхналогій, які вызначаецца на аснове адкрытасці да распрацоўкі новых тэхналогій і стварэння інавацый.