Сенатарам учынілі «лічбавы дэтокс» падчас разбору пра імпічмент Трампа

Амерыканскія заканадаўцы на шмат гадзінаў засталіся без доступу да мабільных тэлефонаў і любых гаджэтаў.

Частка сенатараў, якія ўдзельнічаюць у шматгадзінным разборы з нагоды абвяшчэння імпічменту прэзідэнту Дональду Трампу, заявілі пра тое, што ім падабаецца прынамсі адно з састарэлых патрабаванняў да ўдзельнікаў разбору – поўная забарона на карыстанне мабільнымі тэлефонамі, паведамляе «Голас Амерыкі».

«Мы ўсе – на лічбавай дэтаксікаціі», – сказала сенатарка-дэмакратка Эмі Клобушар падчас перапынку ў працы трэцяга ў гісторыі ЗША разбору ў Сенаце пра імпічмент. «Гэта значыць, што людзям насамрэч давялося глядзець адно на аднаго, а не адводзіць погляд у свой тэлефон».

Правілы правядзення слуханняў, якія абавязваюць гаваркіх сенатараў слухаць выступленні спікераў у поўнай цішыні, былі створаныя з мэтай засяродзіць увагу заканадаўцаў на развязанні найважнейшай задачы, якая цяпер знаходзіцца ў іх руках.

У той самы час, некаторых сенатараў турбуе немагчымасць кіраваць кампаніямі ў зборы сродкаў або нават проста мець зносіны са сваімі сваякамі.

У час цяперашняга разбору сенатары выступаюць у якасці прысяжных засядальнікаў, якія павінны пагадзіцца або не прыняць довады боку абвінавачання – дэмакратаў з Палаты прадстаўнікоў, якія настойваюць на адхіленні Дональда Трампа ад улады.

Падчас перапынку ў сераду сенатар Бэн Кардзін размаўляў з журналістамі, адначасова адпраўляючы тэкставае паведамленне ўнучцы са свайго айфона. Кардзін растлумачыў, што ў яго няма магчымасці адпраўляць СМС падчас паседжання.

«Гэта – яшчэ адна перавага. Я хачу аддаваць увагу таму, што адбываецца, і каб мяне ад гэтага не адрывалі. Я не супраць таго, каб вызваліцца ад сваіх электронных прыладаў», – заявіў дэмакрат Кардзін.

Сенатарам у прынцыпе нельга карыстацца мабільнікамі на пасяджэннях, аднак гэтае правіла становіцца яшчэ больш строгім падчас слуханняў пра імпічмент, якія доўжацца шмат гадзінаў і заканчваюцца глыбока за поўнач.

Чальцы абедзвюх партый, у тым ліку чацвёра дэмакратаў, якія ўдзельнічаюць у прэзідэнцкай гонцы, даручылі сваім памочнікам падтрымліваць сувязь з выбарнікамі і іншымі людзьмі, якія знаходзяцца па-за межамі Капітолія.

Клобушар, якая прэтэндуе на ўдзел у прэзідэнцкіх выбарах, перадала кантроль за сваімі сацсеткамі дачцэ Абігайль, якая цяпер агітуе за маці ў штаце Аёва напярэдадні кокусаў – яны пройдуць у Аёве ўжо 3 лютага.

«Мая мама сёння знаходзіцца ў Вашынгтоне, так што я буду весці яе старонку на твітары падчас паездкі ў Аёву», – сказала дачка Эмі Клобушар.

Палітолаг, які працуе на канале CNN, выказаў здагадку, што рэспубліканец Тэд Круз у парушэнне правілаў пранёс у залу пасяджэнняў свой мабільнік, з якога сенатар нібыта публікуе твіты. Гэта змусіла прэс-сакратарку Круза Ларэн Арансан выпусціць паведамленне з аспрэчаннем здагадкі CNN.

Сенатар Міт Ромні, адзін з чацвярых рэспубліканцаў-цэнтрыстаў, часткова згодных з прапановамі дэмакратаў пра выклік сведак і прадастаўленне дакументаў ад адміністрацыі, прызнаўся ў тым, што яму не падабаецца адчуваць сябе адарваным ад сваіх супрацоўнікаў.

«Павінен сказаць, што я сумую па сваіх электронных камунікацыях. У гэтым няма ніякага сумневу», – заявіў Ромні падчас кароткага перапынку ў слуханнях.