Трамп і Байдэн спрабуюць «перавабіць» сабе штаты, якія галасавалі за кандыдатаў з іншай партыі

Прэзідэнт вядзе кампанію ў Невадзе, а ягоны спаборнік-дэмакрат у Паўночнай Караліне.

Прэзідэнт ЗША Дональд Трамп і ягоны спаборнік на выбарах дэмакрат Джо Байдэн у нядзелю перайшлі ў «наступ»: абодва кандыдаты вядуць кампанію ў тых штатах, якія яны спрабуюць «перацягнуць» на свой бок на выбарах 3 лістапада, паведамляе «Голас Амерыкі».

Трамп пачаў свой дзень у Невадзе, дзе наведаў царкву (што з'яўляецца рэдкасцю для яго) перад вячэрнім мітынгам у Карсан-Сіці. Невада калісьці ўважалася за штат, які вагаецца, але не галасавала за рэспубліканскага кандыдата ў прэзідэнты з 2004 года.

Каталік Байдэн наведаў імшу ў Дэлавэры, пасля чаго адправіўся ў Паўночную Караліну, дзе дэмакрат не перамагаў у барацьбе за Белы дом з часоў Барака Абамы ў 2008 годзе.

Абодва кандыдаты спрабуюць дамагчыся поспеху ў штатах, якія могуць дапамагчы забяспечыць ім перамогу, але дынаміка гонкі застаецца дзіўна стабільнай. Байдэн атрымаў значную перавагу ў нацыянальных апытаннях, але яна не такая значная ў штатах, якія вагаюцца.

У той час як Трамп сядзеў у першым шэрагу неканфесійнай Міжнароднай Царквы Лас-Вегаса, старэйшая памочніца пастара Дэніс Гуле заявіла прысутным, што Бог сказаў ёй, што прэзідэнт з'яўляецца яго зрэнкай вока, і ён атрымае другі тэрмін.

«А 4:30 Гасподзь сказаў мне: «Я дам вашаму прэзідэнту другую перамогу», - сказала яна і, звярнуўшыся да Трампа, заявіла: «Вы зноў станеце прэзідэнтам».

У кароткім выступе Трамп сказаў, што ён «любіць наведваць цэрквы», і што для яго быў «вялікі гонар» пабываць на гэтым набажэнстве.

«У нас ёсць група з іншага боку, якая не згодная з намі», - дадаў ён, заклікаўшы людзей узяць удзел у галасаванні «3 лістапада ці раней». Перад сыходам прэзідэнт паклаў пачак 20-даляравых купюр у талерку для збору ахвяраванняў.

Нягледзячы на пандэмію, як адзначаецца, падчас службы не было ніякіх абмежаванняў для сацыяльнага дыстанцыявання. Не абмяжоўваліся і спевы, якое, на думку прадстаўнікоў органаў аховы здароўя, з'яўляюцца дзейнасцю з высокай ступенню рызыкі. Мала хто з прысутных быў у масках унутры царквы.

Джо Байдэн, у сваю чаргу, звярнуўся да прыхільнікаў на мітынгу ў Дарэме, Паўночная Караліна, удзельнікі якога сядзелі ў аўтамабілях. Ён засяродзіў асноўную ўвагу на прасоўванні змяненняў у сферы крымінальнага правасуддзя для барацьбы з негалосным расізмам і паабяцаў садзейнічаць павышэнню дабрабыту прадстаўнікоў афраамерыканскай абшчыны.

Падчас выступу са сцэны на паркоўцы, дзе знаходзілася блізу 70 аўтамабіляў, Байдэн сказаў, што Паўночная Караліна мае вызначальнае значэнне для ягонай перамогі.

«Зыход справы вызначыцца тут, у Паўночнай Караліне – сказаў Байдэн, зняўшы маску падчас выступу. - Стаўкі яшчэ не былі такія высокія».

Ён заўважыў, што Трамп на адным са сваіх мітынгаў сказаў, што краіна ўжо перажыла найгоршае ў барацьбе з пандэміяй.

«Як сказаў бы мой дзядуля, гэты хлопец здурнеў, калі мяркуе, што найгоршае ўжо ззаду. Найгоршае ззаду? Усё становіцца толькі горш», - сказаў кандыдат-дэмакрат.

У апошнія дні перадвыбарнай гонкі кандыдаты выкарыстоўваюць зусім розныя падыходы. Так, Байдэн прызывае ўлічваць рэкамендацыі органаў аховы здароўя ў вядзенні кампаніі падчас пандэміі. Ён носіць маску на публіцы, калі не выступае з прамовай, а на ягоных мерапрыемствах выконваецца сацыяльная дыстанцыя.

Трамп жа вярнуўся да сваіх мітынгаў, удзельнікі якіх стаяць плячом да пляча, прычым многія без масак. Ён па-ранейшаму імкнецца не надаваць вялікага значэння каранавірусу, хоць сам нядаўна на яго перахварэў.

Цяперашняя перавага Байдэна перад Трампам выяўляецца не толькі ў выніках апытанняў, але і ў грашах. За апошнія чатыры месяцы ягоная кампанія сабрала больш за мільярд даляраў, і гэта дазволіла яму зацямніць некалі велізарную грашовую перавагу Трампа.

Гэта стала відавочным у рэкламе, дзе Байдэн і ягоныя хаўруснікі-дэмакраты ідуць да таго, каб апярэдзіць Трампа і рэспубліканцаў у выдатках удвая ў апошнія дні гонкі, паводле звестак кампаніі Kantar/CMAG, якая займаецца сачэннем за рэкламай.

Хоць Трамп у значнай ступені знізіў рэкламную кампанію ў штатах Сярэдняга Захаду, якія забяспечылі ягоную перамогу ў 2016 годзе, ён уклаў значныя сродкі ў іншых штатах, у тым ліку ў Паўночнай Караліне, дзе ён можа апярэдзіць Байдэна ў выдатках.

У Невадзе, дзе Дональд Трамп быў блізкі да перамогі ў 2016 годзе, дэмакраты, відавочна, апярэдзяць ягоную кампанію ў выдатках больш чым утрая ў апошнія дні перад выбарамі.

Візіт Трампа ў штат з'яўляецца часткай агрэсіўнага плана перадвыбарных мерапрыемстваў. Спрабуючы не дапусціць, каб яшчэ больш выбарнікаў настройваліся супраць яго, кіраўнік Белага дома спрабуе прадставіць дэмакратаў «антыамерыканскімі радыкаламі» ў «крыжовым паходзе супраць амерыканскай гісторыі». Ён заявіў умераным выбарнікам, што іх «маральны абавязак» - уступіць у Рэспубліканскую партыю.

Джо Байдэн пачаў свой дзень з імшы ў царкве Святога Язэпа ў Дэлавэры, як ён робіць амаль кожны тыдзень. Ён і ягоная жонка Джыл увайшлі ў царкву ў цёмных масках. Джыл несла ў руках букет кветак.

Царква знаходзіцца ў некалькіх хвілінах язды ад дома Байдэна. На могілках пры царкве пахаваны сын Байдэна Бо, памерлы ад раку мозгу ў 2015 годзе. Пасля службы Джо і Джыл Байдэн наведалі ягоную магілу.