Беларускі футбаліст Максім Шыла: У нас пратэст годнасці і салідарнасці
- 21.10.2020, 18:52
- 19,184
Спартовец заявіў аб поўнай салідарнасці з беларускім народам.
Беларускі абаронца кыргызскага футбольнага клуба «Дардой» Максім Шыла ў інтэрв'ю Tribuna.com распавёў пра тое, што не галасаваў на выбарах прэзідэнта Беларусі.
«Я не галасаваў. Нават не хацеў ісці на выбарчы ўчастак. Чаму? За мяне ўжо прагаласавалі. У гэты час быў на лецішчы. Сам ведаеш, інтэрнэту ў краіне не было, таму пра вынікі выбараў пачуў па радыё. Выцягнуў антэну і пачуў, пра 80 адсоткаў. Калі шчыра, гэта было прадказальна.
Але калі нам уключылі інтэрнэт...Глядзіш відэа і хапаешся за галаву. Агрэсія сілавікоў - гэта нешта за гранню. Цяпер пра гэта кажу, і па скуры бягуць мурашкі. Тое, што адбываецца на вуліцах Менска, проста шакавала. Што павінна адбывацца ў галаве, каб з такой агрэсіяй ставіцца да ўласнага народу? Не разумееш, чаму ўсё гэта адбываецца ў нашай краіне? Чаму няма ніякага дыялогу? З часам наш пратэст паволі ператварыўся ў пратэст годнасці і салідарнасці. Кожную нядзелю пасля пералёту ў Кыргызстан адкрываў Tut.by і Onliner, каб сачыць за навінамі. Сядзеў і думаў: «Толькі б усё прайшло без ахвяраў». Асабіста я супраць таго, што адбываецца пасля выбараў у нашай краіне. Цалкам салідарны з беларускім народам», - сказаў Шыла.