Менскія школьнікі трапілі ў шпіталь пасля перакусу шаўрмой

Як фастфуд апынуўся ў школе?

23 лістапада 2020 года ў мінулую пятніцу вучні сярэдняй школы №61 Менска трапілі ў шпіталь з болем у жываце і ванітамі. Бацькі распавялі, што да гэтага школьнікі елі ў сталовай шаўрму, паведамляе rebenok.by.

Ёсць меркаванне, што менавіта яна стала прычынай непрыемных сімптомаў. У каментарах многія дзівіліся таму, як наогул шаўрма трапіла ў школьнае меню.

Журналісты задалі гэтае пытанне начальніцы тэхналагічнага аддзела Камбіната школьнага харчавання Менска Таццяне Лабушавай.

- Гэта не шаўрма. Страва называецца «чыкен-рол «Маленькі цэзар». Усе прадукты падабраныя з улікам дзіцячай дыеты. Там няма нічога шкоднага. Тонкі лаваш, абсмажанае філе курыцы, апараная пекінская капуста і морква з соллю, часнаком. Да інгрэдыентаў дадаецца цёрты сыр. Лаваш разгортваецца, на яго кладзецца філе, гародніна і сыр, плюс соус са смятаны і маянэзу. Рол закручваецца, яго змазваюць яйкам і дадаткова тэрмічна апрацоўваюць у духоўцы.

Гэта страва, паводле слоў спецыяліста, не навіна: чыкен-рол быў уключаны ў меню ў 2018 годзе.

- Усім падабалася. Гэта адзіная пакуль страва накшталт «фастфуду». Хацелася завабіць дзяцей, каб ім было цікава абедаць.

Пасля атручвання бацькі пачалі вылучаць гіпотэзы - пра тое, што яго прычынай маглі быць грыбы, магчыма, дададзеныя ў соус, або невыкананне правілаў пры транспартаванні абедаў.

- Грыбы ў школьным харчаванні наогул забароненыя, - каментуе Таццяна Лабушава. - Мы нават маянэз выкарыстоўваем на лімоннай кіслаце, без воцату. І мала яго там: 10 грамаў маянэзу і столькі ж смятаны.

Што тычыцца транспартавання, у камбінаце падкрэсліваюць: гатовыя абеды па школах ніхто не развозіць. Уся ежа, прынамсі 90%, кажа тэхнолаг, гатуецца ў харчблоках школ:

- Чыкен-рол таксама рыхтавалі ў харчблоку. Прыязджае лаваш, смятана, іншыя прадукты ад пастаўшчыкоў згодна з заяўкамі (пастаўшчыкі адны і тыя ж). Усё ў ўпакоўках, з накладнымі, захоўваецца як трэба. Падалі заяўку, дапусцім, такая-та колькасць дзяцей выбрала такі комплекс (рол уваходзіў у комплекс №2 з абедзеннага меню). Зыходзячы з запыту, гатуецца пэўная колькасць порцый. Работнікі харчаблока на месцы рэжуць філе курыцы, абсмажваюць яго і так далей. Так што няма імавернасці парушыць нейкія нормы падчас дастаўкі прадуктаў.

- Скаргі паступілі толькі са СШ №61? Кажуць, што ў 37-й школе таксама камусьці з дзяцей было нядобра.

- Пацверджаных выпадкаў, скаргаў не паступала.

Школу абслугоўвае іншая брыгада работнікаў

З інфармацыі на раніцу панядзелка, у шпіталі застаюцца шасцёра дзяцей. Усяго па меддапамогу звярнуліся 174 вучні школы, 18 дзяцей трапілі ў шпіталь.

Пацярпелі ў асноўным хлопцы 5-9-х класаў. Зараз ідзе эпідэміялагічнае расследаванне, крыніцу магчымага заражэння ўсталёўваюць лекары Менскага гарадскога цэнтра гігіены.

Спецыяльная камісія высвятляе прычыны таго, што адбылося.

Першая намесніца дырэктара камбіната Міраслава Крыцкая адзначыла, што іх спецыялісты пастаянна на сувязі з санітарнай службай, але вынікаў праверкі пакуль няма. Сёння 61-ю школу абслугоўвае іншая брыгада работнікаў.

- Пакуль мы адхілілі калектыў, людзі праходзяць дадатковае медыцынскае абследаванне для атрымання новай даведкі. Калі яны здаровыя, значыць, будуць працаваць. Зараз у школу заступілі зусім іншыя работнікі, але харчаванне мы забяспечваем у ранейшым рэжыме. Гэта значыць вярнуліся да меню верасня-кастрычніка. Чыкен-ролу там няма.

Выпадкі атручвання, кажуць у камбінаце, бываюць вельмі рэдка.

- Я нават не ўзгадаю такога, - заўважае першы намеснік дырэктара.

- Бацькі мяркуюць, што віной усяму можа быць стафілакок. Вы чулі пра гэта?

- Чула, што мяркуюць, але канчатковая карціна не ясная.

Бацькоўскі школьны чат пасля НЗ бурліць: вылучаюцца самыя розныя версіі таго, што адбылося. Многія дзеці сёння не сілкаваліся ў сталовай, прыносілі ежу з сабой. Адміністрацыя школы намагае на тым, каб дзеці сілкаваліся цэнтралізавана.

Масавае атручэнне школьнікаў расследуе Следчы камітэт. Распачатая крымінальная справа - паводле ч. 1 арт. 336 (Парушэнне санітарна-эпідэміялагічных, гігіенічных патрабаванняў і працэдур або санітарных норм і правілаў, гігіенічных нарматываў, што пацягнула з неасцярожнасці атручванні людзей) Крымінальнага кодэкса.