«Быў, ёсць, буду»: сёння Уладзіміру Караткевічу – 90

Пісьменнік стаў адным з апосталаў нацыянальнага адраджэння беларусаў.

Аўтар раманаў «Каласы пад сярпом тваім», «Хрыстос прызямліўся ў Гародні», аповесцяў «Дзікае паляванне караля Стаха», «Чорны замак Альшанскі» многіх кніг паэзіі, перакладаў, нарысаў, Уладзімір Караткевіч вучыў беларусаў любіць сваю зямлю. І па гэты дзень ён застаецца адным з самых чытаных беларускіх пісьменнікаў.

Уладзімір Караткевіч нарадзіўся 26-га лістапада 1930 года ў сям'і рускамоўнага чыноўніка ў горадзе Ворша. Падчас вайны ён быў эвакуаваны спачатку ў Перм, а затым у Арэнбург. Сярэднюю адукацыю ён атрымаў у Воршы. Скончыў філалагічны факультэт Кіеўскага ўніверсітэта. Свабодна валодаў украінскай мовай і меў рэпутацыю «ўкраінскага нацыяналіста».

У 1954 - 1956 гг. быў настаўнікам у сельскай школе недалёка ад Кіева і з 1956 да 1958 выкладаў у родным горадзе Ворша. Пазней вучыўся на курсах літаратуры і кінематаграфіі ў Маскве. З 1962 года і да сваёй заўчаснай смерці ў 1984 годзе жыў у Менску.

У 2010 годзе Кася Камоцкая і Віктар Корзун знялі для тэлеканала «Белсат» дакументальны фільм, які распавядае пра таямніцы ўплыву твораў Караткевіча на фармаванне беларускай нацыянальнай свядомасці. А таксама падсвядомасці.

Фільм называецца «Уладзімір Караткевіч. Душа застанецца» - па першым радку аднаго з вершаў аўтара.