Зяленскі запрасіў Трампа ў Кіеў

Таксама Уладзімір Зяленскі запрасіў амерыканскіх інвестараў ва Украіну.

Прэзідэнт Украіны Уладзімір Зяленскі хацеў бы, каб яго наступны візіт у Злучаныя Штаты быў чымсьці асаблівым для дзвюх краін. Пра гэта ўкраінскі лідар заявіў 15 лютага падчас дыскусіі на палях Мюнхенскай канферэнцыі ў пытаннях бяспекі, паведамляе «Голос Америки».

Ён таксама выказаў упэўненасць, што сустрэча з прэзідэнтам ЗША Дональдам Трампам «адбудзецца».

«Калі ў нас была сустрэча з Майкам Пампея, я казаў, што вельмі хацеў бы, каб мой візіт у Амерыку быў чымсьці асаблівым для абедзвюх краін, з вельмі важным вынікам для дзвюх краін, чымсьці выгадным для дзвюх краін. [...] Я хачу прыехаць і з «чыстага ліста» пачаць нашы адносіны, каб мы дамовіліся, падпісалі нейкія кантракты, дамовіліся пра стратэгічныя рэчы, пра інвестыцыйныя рэчы. Давайце падрыхтуем пакет дакументаў і сустрэнемся. І таму цяпер мяч на баку прэзідэнта ЗША, але мы заўсёды рады бачыць усіх ва Украіне. Запрашаю прэзідэнта Трампа ў Кіеў. І я гатовы яго прыняць хутчэй, чым ён мяне», - адзначыў прэзідэнт Украіны.

Уладзімір Зяленскі зняпраўдзіў здагадкі пра тое, што Украіна застаецца сярод сусветных лідараў карупцыі.

«Гэта не праўда. Калі я сустракаўся з прэзідэнтам Трампам, і ён казаў пра гэта, ён сказаў, што ў папярэднія гады Украіна была такая карумпаваная, і я сказаў яму шчыра, што мы змагаемся з карупцыяй кожны дзень, але, калі ласка, спыніце казаць, што Украіна - карумпаваная краіна. Гэта няпраўда», - падкрэсліў прэзідэнт Украіны Уладзімір Зяленскі.

У той жа час ён падкрэсліў, што «ў нас вельмі добрыя стасункі са Злучанымі Штатамі».

«Я хачу падзякаваць усім, хто да гэтага датычны - і прэзідэнта, і сенатараў, і простых амерыканцаў за тую падтрымку, якую яны нясуць Украіне сёння. Я вельмі ўдзячны і хацеў бы апладзіраваць кожнай амерыканскай сям'і. Мы адчуваем гэта сэрцам і фізічна, акрамя таго, палітычна. Магу сказаць усім у ЗША і Еўропе - дапамагайце яшчэ больш», - сказаў Уладзімір Зяленскі.

На пытанне аб тым, наколькі доўгім будзе перыяд часовай акупацыі тэрыторый у Данбасе, лідар Украіны адзначыў: «Я не ведаю».

«Гэтага хоча Еўропа, я ведаю, у «нармандскім фармаце», трэба, каб гэтага хацела Расея. Расея павінна захацець - аддаць нам нашу зямлю», - падкрэсліў прэзідэнт Уладзімір Зяленскі.

Прэзідэнт Украіны выказаў надзею, што на працягу «гэтых пяці гадоў мы зможам завяршыць вайну».

«Шчыра кажучы, я ўпэўнены ў гэтым, і калі мы гэта зробім, вярнуўшы нашых людзей і тэрыторыі, я буду разумець, што я гэта зрабіў не дарма. Гэта мая мэта», - сказаў Уладзімір Зяленскі падчас трансляцыі яго дыялогу на старонцы офіса прэзідэнта Украіны ў Фэйсбуку.

Ён адзначыў, што моцнае войска або ядзерная зброя, або NATO - гэта абарона незалежнасці і тэрытарыяльнай цэласнасці той ці іншай краіны.

«Ніякія дакументы, ніякія падпісанты, ні мемарандумы не абараняюць. Гэта мы вам гаворым, як украінцы, на сваім прыкладзе - не абараняюць, таму я асабіста не веру ў якія-небудзь паперы. [...] Ніхто, нічога не гарантуе», - сказаў прэзідэнт Украіны і падкрэсліў, што «21 стагоддзе - права моцнага».

Мюнхенская сустрэча з сенатарамі

На канферэнцыі ў пытаннях бяспекі ў Мюнхене прэзідэнт Украіны Уладзімір Зяленскі сустрэўся з дэлегацыяй Кангрэсу ЗША на чале з сенатарам Джэймсам Інхофам.

Як паведаміла 15 лютага прэс-служба ўкраінскага лідара, Уладзімір Зяленскі падзякаваў за магутную падтрымку Украіны з боку абедзвюх палат Кангрэса Злучаных Штатаў.

«Таксама ён выказаў падзяку Джэймсу Інхофу за важныя намаганні Злучаных Штатаў у забеспячэнні такой нязменнай падтрымкі. Кіраўнік дзяржавы падкрэсліў важнае значэнне вайсковай дапамогі і дапамогі ў сферы бяспекі, якую Украіна атрымлівае ад ЗША, і выказаў надзею на павелічэнне яе аб'ёмаў і пашырэнне напрамкаў», - адзначаецца на сайце прэзідэнта Украіны.

Прэзідэнт Уладзімір Зяленскі адзначыў, што Украіна настроеная на правядзенне дэмакратычных рэформаў, эфектыўнай антыкарупцыйнай палітыкі.

«Мы пачалі рэформы ў праваахоўнай сістэме. Перазапусціць Генеральную пракуратуру, ідзе вялікая атэстацыя пракурораў, некалькі тысяч пракурораў былі звольненыя. Іх правяраюць на прыстойнасць і прафесіяналізм. Мы таксама ініцыявалі шмат эканамічных рэформаў. Але ўсё гэта - толькі пачатак», - паведаміў кіраўнік дзяржавы.

Таксама ішла гаворка пра рэфармаванне сектара бяспекі і абароны, між іншым абароннай прамысловасці паводле стандартаў краін - сябраў NATO.

«У нас будзе поўная перазагрузка «Укроборонпрома», каб украінскія абаронныя прадпрыемствы былі эфектыўнымі, сучаснымі і празрыстымі. Калі ёсць праблемы, мы ў пастаянным доступе, гатовыя развязваць усе пытанні», - запэўніў прэзідэнт Украіны.

Ён паінфармаваў амерыканскіх заканадаўцаў аб ходзе перамоўнага працэсу па мірным урэгуляванні ў Данбасе і выказаў зацікаўленасць у больш актыўным прыцягненні да яго ЗША.

Таксама Уладзімір Зяленскі запрасіў амерыканскіх інвестараў ва Украіну і распавёў пра новыя праграмы абароны і падтрымкі для развіцця бізнэсу.