3 красавiка 2020, Пятніца, 7:33
Народны карантын
Рубрыкі

Работнікаў «Нафтана» другім разам судзяць за тыя ж правіны

8
Работнікаў «Нафтана» другім разам судзяць за тыя ж правіны

«Атрымліваў 3 тысячы. Навошта хабар узяў 10 даляраў?»

У Віцебску 17 лютага суд заслухаў апошняе слова асуджаных у 2016 годзе за карупцыю траіх былых топ-мэнэджараў «Нафтана», якім хочуць яшчэ накінуць тэрмін за тыя ж самыя злачынствы. Пасля арышту ў ліпені 2014 мужчыны ўжо правялі ў следчых ізалятарах і калоніях 5,5 года, піша tut.by.

Сутнасць справы. Коратка

У справе фігуруюць тры чалавекі: 57-гадовы экс-намеснік дырэктара «Нафтана» Сяргей Карась, 55-гадовы былы начальнік управы вытворча-тэхнічнай камплектацыі Сяргей Гваздзеўскі і 42-гадовы былы начальнік аддзела камплектацыі Максім Перлаў.

Усіх траіх затрымалі паводле падазрэння ў карупцыі ў ліпені 2014 года. Пры ператрусах у затрыманых канфіскавалі больш за паўмільёна даляраў, арыштавалі сем дарагіх аўто бізнэс-класа і ювелірныя вырабы. Следства паводле справы ішло амаль 2 гады — да сакавіка 2016-га. У тым жа годзе, 1 снежня, суд вынес прысуд.

Было ўстаноўлена, што з чэрвеня 2011-га да ліпеня 2014 года абвінавачаныя атрымлівалі падчас закупаў узнагароджанні за ўкладанне ўгодаў з «Нафтанам». Па матэрыялах справы, яны прычынілі шкоду заводу на 3,4 млн еўра. Пры гэтым больш за 2,3 млн еўра абвінавачаныя кампенсавалі яшчэ да суда.

Сяргей Карась атрымаў 12 гадоў пазбаўлення волі, Сяргей Гваздзеўскі 9 гадоў, Максім Перлаў 7 гадоў. Праз паўгода Вярхоўны суд пакінуў прысуд у дзеянні, і ў чэрвені 2017-га мужчыны апынуліся ў калоніях у Магілёве і вобласці.

А праз два гады, у траўні 2019-га, некалькі эпізодаў з першапачатковага абвінавачвання 2014 года выставілі ў асобную справу і пачалі расследаваць наноў. Пакуль ідзе другі працэс, абвінавачаныя знаходзяцца ў віцебскім СІЗА-2.

Карася, Гваздзеўскага і Перлава зноў абвінавачваюць ва злоўжыванні службовымі паўнамоцтвамі, што пацягнула прычыненне шкоды ў асабліва значнай суме, і атрыманні хабару ў асабліва значнай суме падчас закупаў і падпісання кантрактаў з «Нафтанам». Карася і Перлава таксама абвінавачваюць у замаху на злоўжыванне службовымі паўнамоцтвамі.

Пракурор просіць суд дадаць кожнаму з абвінавачаных па году пазбаўлення волі да тых тэрмінаў, якія яны атрымалі ў 2016 годзе. Гэта значыць, на думку дзяржаўнай абароны, Карась павінен правесці ў зняволенні 13 гадоў, Гваздзеўскі - 10, а Перлаў - 8 гадоў.

«Нафтан» выставіў да абвінавачаных пазоў на кампенсацыю шкоды на суму блізу 270 тысяч еўраў.

Ніхто з траіх віну не прызнаў

У апошнім слове былы намеснік гендырэктара завода «Нафтан» Сяргей Карась быў кароткім:

- Цалкам падтрымліваю свайго адваката. Вельмі моцна спадзяюся на справядлівы прысуд. Спадзяюся, ён будзе адрознівацца ад папярэдняга [у 2016 годзе].

Былы начальнік управы вытворча-тэхнічнай камплектацыі Сяргей Гваздзеўскі мяркуе, што следства было пабудаванае «не на выяўленых фактах атрымання хабараў і перавышэння службовых паўнамоцтваў, а на непаслядоўных успамінах асоб, якія нібыта на чыюсьці просьбу перадавалі гэтыя хабары, гэта значыць, выступалі пасярэднікамі».

- Пазіцыя следства грунтуецца на паказаннях асоб, якія знаходзіліся пад вартай 9 месяцаў, а затым неяк хутка былі вызваленыя, калі далі паказанні патрэбнай накіраванасці. Гэта значыць, 9 красавіка 2015 года яны далі паказанні, а 14 красавіка іх вызвалілі. Усе абвінавачванні заснаваныя на незразумелых вусных указаннях, паказанні сведак супярэчаць адзін аднаму, змяняюцца. У паказаннях няма адзінай лініі, як перадаваліся грошы. Няма ні канкрэтных месцаў, ні канкрэтнай валюты. І ніводзін сведка не пацвердзіў, што я, Гваздзеўскі, лабіяваў нечыя інтарэсы ці браў хабары, узнагароджанні.

Сяргей Гваздзеўскі звярнуў увагу суда на такі момант:

- У судзе агучваліся сумы хабараў: 15, 20, 100, 400 даляраў, еўраў. І нібыта за пяцігоддзе мы назбіралі нейкую суму. Дык гэтая сума - мой двухмесячны заробак на той момант. І якая ў мяне магла быць зацікаўленасць праз нейкія 10 даляраў страціць працу са стабільным заробкам на месяц 3-3, 5 тысячы даляраў у эквіваленце?

Былы начальнік управы вытворча-тэхнічнай камплектацыі заявіў, што «сумленна выконваў свае службовыя абавязкі»:

- Спадзяюся і веру, што ўвесь гэты кашмар скончыцца. Кожнага чалавека, які нешта робіць, можна абвінаваціць. Але ці вінаваты ён? Таму я шчыра, з высока паднятай галавой гляджу ўсім у вочы. А самае галоўнае, што я сумленны перад сабой, перад роднымі. Што тычыцца другога боку ўсіх следчых дзеянняў — хай гэта застанецца на іх сумленні. Час усё рассудзіць. Спадзяюся, што суд прыме правільны прысуд.

Былы начальнік аддзела камплектацыі Максім Перлаў мяркуе - «усё было пабудаванае на здагадках, здагадках і паклёпе з боку асноўных сведак», пры гэтым ні на следстве, ні на судзе не знайшлі ніводнага доваду атрымання ім хабараў.

Перлаў паведаміў, што адзін з яго допытаў ішоў вельмі доўга:

- Так, допыт 8 лютага 2017 года доўжыўся 7 гадзін 45 хвілін. У пратаколе быў пазначаны перапынак на абед з 13.09 да 13.11 — то бок, тры хвіліны. Гэта здзек.

Абвінавачаны папрасіў суд пры вынясенні прысуду ўлічыць гэта і іншыя «шматлікія парушэнні КПК», выкладзеныя ў ягонай скарзе ў пракуратуру:

- Спадзяюся на справядлівы вырак.

Суд абвесціць прысуд 2 сакавіка.