Грэцыя затрымала 10 тысяч мігрантаў на мяжы з Турцыяй

Эрдаган адкрыў мяжу перад сірыйскімі ўцекачамі, што жадаюць патрапіць у Еўропу.

Блізу 10 тысяч мігрантаў, якія спрабавалі трапіць у Грэцыю, былі спыненыя на турэцкай мяжы, абвясцілі грэцкія ўлады, паведамляе ВВС.

Акрамя таго, мінімум 500 чалавек за гэты ж час прыбылі на лодках на грэцкія выспы Лесбас, Самас і Хіёса, дзе лагеры ўцекачоў застаюцца перапоўненымі з 2015 года.

Прэзідэнт Турцыі Рэджэп Таіп Эрдаган у суботу заявіў, што адкрывае мяжу перад сірыйскімі ўцекачамі, што хочуць патрапіць у Еўропу.

«Што мы ўчора зрабілі? Мы адкрылі межы (...) Наша краіна не ў стане справіцца з новай хваляй уцекачоў», - сказаў ён.

Турцыя ўжо прыняла на сваёй тэрыторыі прыкладна 3,7 мільёнаў уцекачоў з Сірыі, а таксама Афганістана і некаторых іншых краін. Па ўмовах пагаднення з ЕЗ ад 2016 года, турэцкія ўлады абяцалі не пускаць іх далей у абмен на фінансавую дапамогу ў суме 6 млрд еўраў.

Яшчэ блізу 3,5 млн уцекачоў знаходзяцца ў сірыйскай правінцыі Ідліб, што мяжуе з Турцыяй, і кантралюецца сіламі, апазіцыйнымі Башару Асаду.

Са снежня мінулага года сірыйскія ўрадавыя войскі пры падтрымцы Ірана і Расеі разгарнулі наступ на Ідліб, паступова займаючы адзін населены пункт за другім. Калі правінцыя пяройдзе пад іх кантроль, колькасць уцекачоў у Турцыі можа падвоіцца.

Рашэнне Эрдагана рушыла ўслед за гібеллю 33 турэцкіх вайскоўцаў у Ідлібе ад авіяўдару, як мяркуецца нанесеным сірыйскімі ПВС.

Прэм'ер-міністр Грэцыі Кірыакас Міцотакіс склікае ў другой палове дня ў нядзелю пасяджэнне рады бяспекі, каб абмеркаваць сітуацыю на мяжы.

Еўрапейскае агенцтва па ахове межаў Frontex аб'явіла стан трывогі на грэцка-турэцкай і балгарска-турэцкай межах.

Што адбываецца ў Грэцыі?

Паводле звестак грэцкай паліцыі, частка размешчаных на турэцкім баку людзей кідаюць у вартавых парадку камяні і металічныя дубцы.

Прыкладна 300 уцекачоў на сямі лодках дасягнулі выспы Лесбас, 150 на чатырох лодках - выспы Самас, і 70-80 чалавек на двух лодках - выспы Хіёса, паведаміў прадстаўнік паліцыі агенцтву Рейтер.

Былі заўважаныя групы людзей, што перабірацца ўброд праз памежную рэчку ў раёне грэцкага горада Кастаніс.

Частка ўцекачоў блакаваная ў памежнай буфернай зоне ў грэцкай правінцыі Эўрас.

«Яны [улады Турцыі] не толькі не спыняюць, а нават садзейнічаюць ім», - заявіў грэцкай тэлевізіі намеснік міністра абароны краіны Алківіадзіс Стэфаніс.

Еўразвяз паабяцаў Афінам і Сафіі дапамогу ў абароне агульнай мяжы адзінай Еўропы. На 5 сакавіка ў харвацкай сталіцы Заграбе запланавана сустрэча міністраў замежных спраў дзяржаў ЕЗ, што склікаецца на просьбу Грэцыі.