Што зменіцца ў Беларусі з 1 красавіка

Нас чакае некалькі падаражанняў.

З 1 красавіка значных змен у заканадаўстве не адбудзецца, піша kurjer.info. Сярод іншых змен: падымецца базавая арэндная плата, падаражэюць цыгарэты, імпартны алкаголь.

Павялічыцца базавая арэндная плата

З 1 красавіка базавая арэндная плата будзе складаць 17,85 рубля. Рост складзе 95 капеек, гэта значыць 5,6%.

Падаражэюць цыгарэты

Вырастуць цэны на некаторыя маркі цыгарэт Гарадзенскай тытунёвай фабрыкі «Нёман», «Тытунь-інвест» і «Беларусьгандаль».

Некаторыя віды Monte Carlo, Camel, Winston пастаўшчыка «Тытунь-інвест» падаражэюць на 5-10 капеек.

З цыгарэт «Беларусьгандля» на 10 капеек вырасце кошт на Davidoff (Refine White, Refine Black), Bond Street (Blue Selection, Premium Special), на 15 капеек - кошт на Davidoff (Classic, Gold, Gold Slims), на 20 капеек - на Pall Mall (Superslims Azure, Superslims Violet).

Падаражэе алкаголь

Прадстаўнікі кампаній-імпарцёраў распавялі пра чаканае павышэнні цэн на імпартаваны алкаголь. Прагназуецца, што кошт віна і моцных напояў для крамаў і ўстаноў грамадскага харчавання вырасце ў межах 10-15%, хоць дакладны памер росту цаны не называюць.

Сярод асноўных прычын, па якіх імпарцёры спіртнога збіраюцца павысіць цэны, - рост курсу еўра і ўзрослыя выдаткі на транспартаванне.

Для допуску да ўдзелу ў дарожным руху не трэба будзе паказваць сертыфікат дзяржтэхагляду

З 1 красавіка для атрымання дазволу на допуск да ўдзелу ў дарожным руху не трэба будзе паказваць сертыфікат пра праходжанне дзяржтэхагляду.

У снежні 2019 года ўказам №492 уведзены новы пералік дакументаў, неабходных для правядзення дзяржтэхагляду. Між іншым, не трэба падаваць работніку дыягнастычнай станцыі талон да пасведчання кіроўцы, медыцынскую даведку аб стане здароўя, а таксама дазвол органа сувязі на права выкарыстання радыёчастотнага спектру пры эксплуатацыі радыёэлектронных сродкаў.