Працаўнікі Twitter змогуць ніколі не вяртацца ў офісы

Кампанія была адной з першых, якая выкарыстала мадэль «праца з дому».

Twitter дазволіць сваім супрацоўнікам працаваць з дому «заўсёды». Пра гэта паведамляе Guardian са спасылкай на электронны ліст генеральнага дырэктара кампаніі Джэка Дорсі.

Прэс-сакратар Twitter пацвердзіў гэтую інфармацыю Guardian, заявіўшы, што кампанія была «адной з першых, якая выкарыстала мадэль «праца з дому» праз COVID-19, але не чакае, што стане адной з першых, чые супрацоўнікі вернуцца ў офісы.

Як гаворыцца ў лісце кіраўніцтва, апошнія некалькі месяцаў паказалі, што супрацоўнікі Twitter могуць працаваць з дома, так што калі яны хочуць «працягваць рабіць гэта заўсёды, мы зробім гэта».

Кампанія настойліва раіла працаваць з дому з 2 сакавіка і перавяла супрацоўнікаў на працу з дому з 11 сакавіка. Але калі хто-небудзь хоча вярнуцца ў офіс, яму ці ёй давядзецца пачакаць як мінімум да верасня. Бо арганізацыя хоча адкрываць офісы паступова, адзін за адным.

Нагадаем, што Google і Facebook працягнулі сваю палітыку «працы з дому» да 2021 года, а Amazon - як мінімум да пачатку кастрычніка.