Замежныя фонды эвакуююць мільёны даляраў з Расеі

Толькі за тыдзень фонды-нерэзідэнты вывелі з расейскіх актываў $ 210 мільёнаў.

Ралі расейскага рынка акцый, які адквітаў амаль усё сакавіцкае падзенне, і ўзлёт да гістарычных максімумаў цаны расейскай дзяржаўнай запазычанасці - выклікалі ўсплёск продажу з боку замежных інвестараў, што паспяшаліся зафіксаваць прыбытак, піша finanz.ru.

За тыдзень з 14 да 20 фонды-нерэзідэнты вывелі з расейскіх актываў 210 млн даляраў - амаль удвая больш, чым тыднем раней, паведамляе ў аглядзе «БКС Глобал Маркетс».

Хоць індэкс РТС абнавіў максімум з 10 сакавіка, кранаючы адзнаку 1243,27 пункта, а індэкс RGBI, які сочыць за цаной аблігацый федэральнай пазыкі, абнавіў рэкорд, узняўшыся вышэй за 157 пунктаў, замежнікі прынялі за лепшае прадаваць ралі: з пункту гледжання струменяў тыдзень стаў найгоршым за два месяцы, зазначае стратэг БКС Вячаслаў Смальянінаў.

Чысты адток капіталу з расейскіх акцый з боку фондаў (з улікам усіх фондаў, якія інвестуюць у акцыі РФ) склаў блізу 160 млн даляраў, а за два тыдні дасягнуў 280 млн. Пры гэтым фонды, што інвестуюць выключна ў Расею, якія яшчэ на пачатку траўня куплялі, таксама пачалі пазбаўляцца ад папер - на 80 млн даляраў.

Аднавіўся адток капіталу з рынку дзяржаўнай запазычанасці: нерэзідэнты вывелі 50 млн даляраў, хоць тыднем раней куплялі аблігацыі (на 20 млн даляраў).

Распродаж ідзе на развіваных рынках шырокім фронтам: за тыдзень фонды EM спрадалі акцый на 1,6 млрд даляраў, а аблігацый - на 1,2 млрд.

«Хоць цэнтральныя банкі працягваюць змякчэнне сваёй грашова-крэдытнай палітыкі, што павышае прывабнасць пазыковых інструментаў у параўнанні з акцыямі EM, сукупны адток з EM кажа, што цікавасць да аблігацый невялікая і можа хутка вытхнуцца», - кажа Смальянінаў.

Пакупнікамі на расейскім рынку застаюцца лакальныя інвестары: адбіваецца «сіндром змарнаванай выгады», адзначае ён: трэйдары, якія прапусцілі рост, спрабуюць ускочыць у апошні вагон, гэтая стратэгія можа абярнуцца стратамі. «Глабальнае ралі ў акцыях цыклічных сэктараў, мусібыць, будзе кароткатэрміновым», - папярэджвае Смальянінаў.

Ад сібернай рэчаіснасці глабальнай рэцэсіі, якая, паводле прагнозу МВФ, стане найгоршай з 1930-х, рынкі бароніць «грашовы мур», збудаваны ФРС, адзначаюць аналітыкі Райфайзэнбанка. За два месяцы амэрыканскі ЦБ павялічыў баланс на 2,9 трлн даляраў, заліваючы ліквіднасцю каранавірусны «пажар».

Але «гісторыя паказвае, што рынкі не ўцякуць ад эканамічнай рэальнасці і мядзведжы рынак будзе працягласцю параўнальны з будучай рэцэсіяй», папярэджвае стратэг BofA Нітын Саксэн.

Цэнтральныя банкі ПАР, Турцыі, Інданэзіі і Тайланда зніжаюць стаўкі адсоткаў, а з імі - і зніжаецца эфект ад аперацый Кэры-трэйд. Узровень праблемнай завінавачанасці развіваных краін расце далей, Аргентыну, напэўна, чакае афіцыйны дэфолт, калі да пятніцы краіна не ўзгодніць з крэдыторамі ўгоду аб рэструктурызацыі запазычанасці на 65 млрд даляраў.

«Рызыкі, безумоўна, захоўваюцца ў вялікай колькасці, - кажа Тру Фам, лонданскі стратэг ING рынкаў запазычанасці EM. - Мяне па-ранейшаму турбуе вонкавая ўразлівасць развіваных рынкаў, якія зноў апынуцца ў цэнтры ўвагі, калі ціск на валюты EM узмоцніцца».